Իրանը միշտ ձգտել է տարածաշրջանում խաղաղության․ նոր մանրամասներ՝ Փաշինյան–Պեզեշքիան հեռախոսազրույցից

Իրանի նախագահ Մասուդ Պեզեշքիանը ՀՀ վարչապետ Նիկոլ Փաշինյանի հետ հեռախոսազրույցի ժամանակ հայտարարել է, որ Իրանը միշտ ձգտել է տարածաշրջանում խաղաղության: Նրա խոսքերը մեջբերում է «Մեհր» գործակալությունը։

«Իրանը երբեք չի ձգտել պատերազմի և անվտանգության բացակայության: Իրանը միշտ կարևոր և արդյունավետ դեր է խաղացել տարածաշրջանում խաղաղության ու կայունության հաստատման գործում», - ասել է Պեզեշքիանը։

«Այնուամենայնիվ, մենք խոսում և բանակցություններ էինք վարում, երբ մեզ վրա հարձակվեց սիոնիստական ռեժիմը՝ հակասելով բոլոր միջազգային չափանիշներին և օրենքներին, իսկ հետո Ամերիկան, այս ռեժիմի հետ լիովին համակարգված, ռմբակոծեց մեր օրինական միջուկային օբյեկտները», - նշել է նա։

Իրանի նախագահը նաև ընդգծել է Թեհրանի և Երևանի միջև երկկողմ հարաբերությունների զարգացման կարևորությունը։

«Մեր քաղաքականությունը բոլոր հարևան երկրների հետ կառուցողական փոխգործակցությունն է՝ հիմված բոլոր երկրների տարածքային ամբողջականության պահպանման վրա»,– նշել է նա։