Բժիշկները զգուշացրել են Թուրքիայի ծովերում վտանգավոր վարակների առկայության մասին

Թուրք բժիշկները զբոսաշրջիկներին զգուշացրել են վտանգավոր Vibrio մանրէներով վարակվելու վտանգի մասին, որոնք կարող են լուրջ հիվանդություններ, այդ թվում՝ խոլերա առաջացնել, գրել է «Gazeta.ru»-ն՝ հղում անելով «Milliyet» թերթին։

Ուրոլոգ Ուղուր Աֆերինի խոսքով՝ Vibrio parahaemolyticus և Vibrio vulnificus մանրէների ԴՆԹ-ն հայտնաբերվել է Մարմարա, Էգեյան և Միջերկրական ծովերի ափերին: Նա բացատրել է, որ այս մանրէները բազմանում են տաք աղի ջրում, և դրանցից մեկը՝ Vibrio cholerae-ն, կարող է օրգանիզմ ներթափանցել աղտոտված ծովային ջրի միջոցով և խոլերա առաջացնել՝ ծանր լուծով և ջրազրկմամբ:  

Մասնագետի խոսքով՝ ծովային ջրի շփումը բաց վերքերի հետ հատկապես վտանգավոր է:  Որոշ շտամներ, մասնավորապես Vibrio vulnificus-ը, կարող են վտանգավոր մաշկային վարակներ առաջացնել, այդ թվում՝ նեկրոտիզացնող ֆասցիիտ, որը հայտնի է որպես «մսակեր մանրէ»: Ծովամթերքի, մասնավորապես՝ հում խեցգետինների մեջ հանդիպող Vibrio parahaemolyticus-ը կարող է որովայնի ցավ, փսխում, լուծ և ջերմություն առաջացնել, իսկ թույլ իմունային համակարգ ունեցող մարդկանց մոտ՝ սեպսիս։

Բժիշկները նաև ամռանը գրանցել են միզաբանական հիվանդությունների աճ, հատկապես կանանց մոտ, թաց լողազգեստները երկարատև կրելու պատճառով։