Իրանը համաձայնել է ԵՄ-ի հետ բանակցությունների նոր փուլ անցկացնել․ ԱԳ նախարար Բաղայի

Իրանը համաձայնել է հուլիսի 25-ին Ստամբուլում Գերմանիայի, Ֆրանսիայի և Մեծ Բրիտանիայի եվրոպական «եռյակի» հետ «միջուկային համաձայնագրի» վերաբերյալ բանակցությունների նոր փուլ անցկացնել։ Այս մասին հայտարարել է Իսլամական Հանրապետության արտաքին գործերի նախարարության ներկայացուցիչ Էսմայիլ Բաղային, հաղորդում է ՏԱՍՍ-ը։

«Եվրոպական երկրների խնդրանքին ի պատասխան՝ Իրանը համաձայնել է բանակցությունների նոր փուլ անցկացնել JCPOA-ի (Համատեղ համապարփակ գործողությունների ծրագիր) երեք եվրոպական մասնակիցների հետ», - պատասխանել է նա իրանցի լրագրողների համապատասխան հարցին։

Նա նշել է, որ նախատեսված հանդիպումը կկայանա փոխարտգործնախարարների մակարդակով։ Հաղորդվում է, որ բանակցություններին Թեհրանը կներկայացնեն քաղաքական հարցերով տեղակալ Մաջիդ Թախտ-Ռավանչին և իրավական և միջազգային հարցերով տեղակալ Քազեմ Ղարիբաբադին։

Հունիսի վերջին IRNA գործակալությունը հայտնել է, որ Իրանը պլանավորում է շարունակել բանակցությունները «եվրոպական եռյակի» երկրների հետ, սակայն հետո նշվել է, որ խորհրդակցությունների հաջորդ փուլի ամսաթիվը դեռևս որոշված չէ։

Վերջին անգամ կողմերը հանդիպել են հունիսի 20-ին՝ Շվեյցարիայի Ժնև քաղաքում, որտեղ «եվրոպական եռյակի» արտաքին գործերի նախարարությունների ղեկավարները մասնակցել են Իրանի արտաքին գործերի նախարարության ղեկավար Աբբաս Արաղչիի հետ բանակցություններ վարելուն։