Բագրատ Սրբազան՝ ընդդեմ պաշտոնյաների. դատական հայցերի մանրամասներ

Այսօր պարզ դարձավ, որ Բագրատ արքեպիսկոպոս Գալստանյանը, ով հայտնի է որպես Բագրատ Սրբազան և նախկինում եղել է Տավուշի թեմի առաջնորդ, դիմել է դատարան՝ մի շարք պաշտոնյաների և քաղաքական գործիչների դեմ՝ պահանջելով փոխհատուցում վիրավորանքի և զրպարտության հետևանքով պատճառված ոչ նյութական վնասի համար։ 

Բագրատ Սրբազանը նաև «Տավուշը հանուն հայրենիքի» շարժման առաջնորդն է։ Շարժումը ձևավորվել էր 2024 թվականին Կիրանց–Ոսկեպարի հատվածում Հայաստանի և Ադրբեջանի միջև սահմանազատման միակողմանի մեկնարկի դեմ։ Չնայած նրան, որ նրա եկեղեցական լիազորությունները սառեցվել են, նա շարունակում է հանդես գալ քաղաքական հայտարարություններով և գործունեությամբ։ 

Սրբազանը մոտ 6 միլիոն դրամ փոխհատուցում է պահանջում «Քաղաքացիական պայմանագիր» կուսակցության անդամ, Ազգային ժողովի պատգամավոր Վահագն Ալեքսանյանից։ 

Եվս 3-ական միլիոն դրամ փոխհատուցում է պահանջվում առողջապահության նախարար Անահիտ Ավանեսյանից, «Հանրապետություն» կուսակցության առաջնորդ Արամ Սարգսյանից (ով սպարապետ Վազգեն Սարգսյանի եղբայրն է), նույն Երևանի ավագանու անդամ Անի Խաչատրյանից, ԱԺ նախկին պատգամավոր Ստյոպա Սաֆարյանից և քաղաքագետ Հարություն Մկրտչյանից։ Բագրատ Սրբազանի փաստաբան Հովհաննես Խուդոյանը անդրադառնալով դատական հայցերին, պարզաբանել է, որ դրանք «Սրբազան պայքարի» այն խոստման իրականացումն են՝ անպատասխան չթողնել ապօրինի վարքագիծը։ 

Ըստ Խուդոյանի՝ Բագրատ Սրբազանի և «Սրբազան պայքարի» այլ մասնակիցների ապօրինի ձերբակալություններին զուգահեռ, իրավապահ մարմինների, քաղաքական մեծամասնության և տարբեր օղակների քարոզիչների կողմից նախաձեռնվել էր տեղեկատվական արշավ՝ անմեղության կանխավարկածի խախտումներով, վիրավորանքներով ու զրպարտիչ արտահայտություններով։

«Այդ արշավը ուղղված էր ինչպես քաղաքական հետապնդումների ապօրինությունները քողարկելուն, այնպես էլ և առավել ևս հետագա ապօրինի գործողությունների, օրինակ՝ Մայր Աթոռի վրա հարձակում նախապատրաստելուն»,- նշել է փաստաբանը։ 

Նշվում է, որ հայցերն ընդամենը մի քանի օր առաջ են ներկայացվել, և թիրախավորված անձինք հարյուրից ավել հնարավոր պատասխանողներից ընտրվել են «պատահականորեն»։ Փաստաբանը հայտարարել է, որ առաջիկայում նոր հայցեր են ներկայացվելու։ ՀՀ առողջապահության նախարար Անահիտ Ավանեսյանն արձագանքել է Բագրատ Սրբազանի՝ իր դեմ դատական հայց ներկայացնելու հրապարակմանը։

««Հետք»-ի հրապարակումից տեղեկացա, որ Բագրատ Գալստանյանն ինձ դատի է տվել վիրավորանքի և զրպարտության համար։ Հետաքրքիր է՝ «գյուլլելու» իր անհագ ցանկությո՞ւնն է փոխակերպվել դատական կարգով դժգոհությունը արտահայտելու ձևով, թե՞ դեռ պտտում է գլխում ահաբեկչական մյուս սցենարները»,- գրել է նախարարը՝ հղում անելով Քննչական կոմիտեի հրապարակած ձայնագրություններին և Բագրատ Սրբազանին վերագրելով «ահաբեկչական սցենարներ» մտածելու մեղադրանքը։ Ավանեսյանը նաև կոչ է արել. 

«Կանգ մի՛ առեք, դիմե՛ք նաև միջազգային տարբեր ահաբեկչական կազմակերպություններ՝ բողոքով, որ ՀՀ իշխանությունները կանխել են հեղաշրջման փորձերը Հայաստանում»։ Իր գրառման վերջում նախարարը կրկին տեղադրել է ՔԿ հրապարակած ձայնագրություններից հետո արված իր նախորդ գրառումը և առաջարկել. «միասնական հայց ներկայացնել ժողովրդին՝ «խորը անասուն» անվանած անձի դեմ։ 

Այս ժամանակը լավ կլինի ապաշխարության համար օգտագործեք...»։ Սա ևս մեկ ուղիղ հղում է Բագրատ Սրբազանին վերագրվող «խորը անասուն» արտահայտությանը, որը հասցեագրված էր վարչապետ Նիկոլ Փաշինյանին։

Հիշեցնենք, որ Բագրատ Գալստանյանը կալանավորվել է երկու ամսով և մեղադրվում է ահաբեկչական դրսևորումների, զանգվածային անկարգությունների հրահրման և իշխանության բռնազավթման նախապատրաստման մեջ։ Նրա փաստաբան Հովհաննես Խուդոյանը պնդում է, որ սա քաղաքական հետապնդում է։ Իրավապահները, հակառակը, մատնանշում են Սրբազանի խոսքերն ու գործողությունները, որոնք՝ ըստ իրենց, վեր են ածվել հանրային սպառնալիքի։

Մանե Գևորգյան