Հայաստանից տարածքների հանձման 3-րդ արարը. Փաշինյանի գաղտնի քայլերը ժողովրդի թիկունքում
Аналитический![Հայաստանից տարածքների հանձման 3-րդ արարը. Փաշինյանի գաղտնի քայլերը ժողովրդի թիկունքում](/timthumb.php?src=disc/20-04-24/2a80743d8d8ed37d4aee61110538a2db.jpg&w=780)
Երեկ վարչապետի աշխատակազմը տարածեց հայտարարություն, որը հերթական անգամ փաստի առջև կանգնեցրեց ՀՀ քաղաքացիներին և հերթական անգամ միակողմանի զիջումներ էր ենթադրում թշնամուն: Փաստացի, Կիրանց ու Ոսկեպար գյուղից հյուսիս-արևելք ընկած հատվածները, ըստ երեկվա հաղորդագրության, մայիսի 15-ից հետո հանձնվելու են Ադրբեջանին: Մայիսի 15-ից սկսած՝ այդտեղ գտնվող հայկական ամեն ինչ դառնում է Ադրբեջանի համար լեգիտիմ թիրախ: Փաշինյանը այս որոշմամբ քանդում է ՀՀ ամենապաշտպանված սահմանային գիծը: Սահմանագծման արդյունքում թշնամուն են հանձնվում ոչ միայն հիշյալ գյուղատեղիները, այլև Երևան – Թբիլիսի միջպետական մայրուղու հատվածներ՝ Իջևանի և Նոյեմբերյանի շրջանների Կիրանց - Ոսկեպար – Բաղանիս գյուղերով պարփակված հատվածում՝ վտանգելով Հայաստան մտնող գազամուղը: Թշնամին տվյալ հատվածում 5 տեղից մուտք է գործելու Երևան–Թբիլիսի միջպետական մայրուղու վրա: Կարելի է ասել՝ միջպետական ճանապարհն այդ հատվածում իսպառ փակվում է Գորիս-Կապան մայրուղու օրինակով: Բացի այդ, ունենալու ենք ադրբեջանական խոշոր հենակետեր, որտեղից Վանաձոր, Ալավերդի ու Իջևան տասնյակ կիլոմետրերի հեռավորություն է լինելու:
Հաջորդ վտանգավոր կետը՝ ՀՀ ԶՈՒ նահանջն է, ինչը, ըստ էության, կազմաքանդելու է Տավուշի առաջնագիծը: Ոչ պակաս ուշագրավ շեշտադրում է խաղաղապահների տեղակայումը: Հանրությանը որևէ խոսք այս մասին չէր ասվել, իսկ եթե ընդունենք, որ այս փաստաթուղթն ի մի բերելու բանակցությունները բավական երկար էին ընթանում, ապա խաղաղապահների հետ էլ բանակցությունները երեկ չէ, որ սկսվել են: Սա հերթական գաղտնի քայլն է ժողովրդի թիկունքում և դեռ հարց է՝ ովքե՞ր են լինելու այդ խաղաղապահները: Կա երկու տարբերակ՝ ռուսական կողմը, որի ռազմաբազան այսօր պահում է հայ-թուրքական սահմանը և միայն հեռադիտակներով զինված, որևէ գործնական քայլերի դիմելու մանդատ չունեցող եվրոպացի դիտորդները: Հաշվի առնելով Փաշինյանի քաղաքական դրեյֆը դեպի Արևմուտք՝ դժվար չէ կռահել՝ ում վրա է կանգ առել վերջինիս ընտրությունը և ինչ վտանգներ է դա պարունակում սահմնամերձ շրջանների բնակիչների համար:
Բացի այդ, վարչապետի աշխատակազմը հետաքրքիր միջոց էր գտել հանրությանը սփոփելու՝ հայտարարելով, որ, ըստ էության, Բաքվին նվիրում են ոչ թե 4, այլ 2.5 գյուղ: Սակայն, կասկած չկա, որ մյուս գյուղերին, որոնք դեռ չեն հայտնվել այս ցանկում՝ նույն ճակատագիրն է սպասվում, միայն թե՝ արդեն հաջորդ փուլում: Եթե ոմանց մոտ կարող է տպավորություն ստեղծվել, որ Հայաստանից տարբեր հատվածների հանձնումն սկսում է Տավուշի գյուղերից, ապա դա այդպես չէ: Հայաստանի հանձնումը Փաշինյանն ու թիմակիցներն սկսել են Սյունիքում բանավոր փոխըմբռնմամբ շուրջ 200 քկմ հանձնելով, ընդ որում՝ զորքին այդ ընթացքում տված էր չկրակելու հրաման և որպես արդյունք տեղ-տեղ նաև հայկական և ադրբեջանական զինված ուժերի միջև անգամ ձեռնամարտեր էին տեղի ունենում: Մեկ այլ դրվագ էլ չմոռանանք, 2021-ին համացանցում տարածված փաստաթուղթը եկավ ապացուցելու հակառակը, որ բացի հայտնի կապիտուլյացիոն փաստաթղթից, առնվազն մեկ փաստաթուղթ ևս կա, որի համաձայն՝ Փաշինյանի ձեռամբ` ՀՀ–ն Իրանին կապող գլխավոր և ռազմավարական առումով կարևորագույն ավտոճանապարհի մի հատվածը հայտնվել է ադրբեջանական տիրապետության տակ՝ Սյունիքը կանգնեցնելով անվտանգային լրջագույն խնդրի առջև։ Հիշեցնենք, որ այն ժամանակ դեռ փոխվարչապետի պաշտոնը զբաղեցնող Տիգրան Ավինյանը ԱԺ-ում փաստացի չէր հերքել այս փաստաթղթի իսկությունը:
![](banners/armflix.jpg)