ԱՄՆ-ն հավատարիմ է Երևանի և Բաքվի միջև խաղաղ գործընթացին. Օ'Բրայեն
СпортԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայենը Բաքվում Իլհամ Ալիևի հետ հանդիպմանը հայտարարել է Վաշինգտոնի՝ հայ-ադրբեջանական հարաբերությունների կարգավորման հանձնառությունը։
Ամերիկացի դիվանագետը նշել է ամերիկաադրբեջանական համագործակցության կարևորությունը և կողմ է արտահայտվել երկկողմ կապերը ռազմավարական մակարդակով զարգացնելուն։ Այս համատեքստում կողմերը քննարկել են տարածաշրջանային համագործակցությունը և Անդրկասպյան միջազգային տրանսպորտային երթուղու գործարկումը։
Ավելի վաղ, ինչպես հայտնել ենք, Օ՛Բրայենը Ներկայացուցիչների պալատի արտաքին հարաբերությունների հանձնաժողովում կայացած լսումների ժամանակ ասել էր, որ այցի ընթացքում Ալիևին կփոխանցի խաղաղության անհրաժեշտության մասին ուղերձը։ Նրա խոսքով՝ ԱՄՆ-ն ձգտում է ապահովել, որ Կենտրոնական Ասիայից ապրանքների արտահանումն իրականացվի այլընտրանքային ուղիներով՝ շրջանցելով Ռուսաստանը և Չինաստանը, այդ թվում՝ Ադրբեջանով։
Սակայն այս նպատակին հասնելու համար անհրաժեշտ է Ադրբեջանի և Հայաստանի միջև խաղաղ համաձայնագիր կնքել։