Այս օրն է ծնվել արձակագիր, հրապարակախոս, կինոռեժիսոր Աղասի Այվազյանը (տեսանյութ)

«Հեռապատկերը չէր երևում... Հինգ շարք տարիներ էին... Սկսեցիր քայլել... Շարքերը դարձան տասը... Վազեցիր... Ավելի արագ... Էլ ավելի թեթևակի... Ոտքերիդ տակ հողը և՜ պինդ էր, և՜ հող չկար... Հեռապատկերը այդպես էլ չէր երևում... Եվ տեսնելու, նկատելու միտում էլ չունեիր, պարզապես չէիր մտածում դրա մասին, այսինքն՝ ընդհանրապես միտք գոյություն չուներ... Ընթացքդ դարձավ արագապտույտ... Հայտնվեց երկու տարիների համակցությունը՝ ձեռք-ձեռքի բռնած, չգիտես ինչու մեղավոր ու շփոթված: Ինչո՞ւ, ինչո՞ւ... Ինչի՞ց եք շփոթվել... Անձրևի՞ց... Ցրտի՞ց... Անձրևաջրի կաթիլների հավերժության մելամաղձը երգող կաթկթոցի՞ց... Ասֆալտի վրայի նրա թողած հպանցիկ որմնանկարի՞ց... Օրվա երկարությունի՞ց, նրա մգլոտ միապաղաղ սահմանափակությունի՞ց... Չգիտե՜ս: Իհարկե՝ չգիտես: Այն որ պառավ, իր օրն ապրած պոռնիկը յուր փոքրիկ դստերն է բերել-ցուցադրել թաց մայթի բեմին՝ մի պատառ հաց վաստակելու նպատակո՞վ... Չէ: Իհարկե՝ չէ: Քանզի դու էլ ես նրաց նայում շաա՛տ-շաա՛տ հեռվից, դեռ տեսողության հարթակին չհասած: Քո մեջ էլ զզվանքը վերածվում է հեշտասիրության, տարպանքի... Ո՞վ ես դու: Հենց նոր հայտնված գո՞յ: Քո մի փոքրիկ կյանքի աննշան հատվածը փռելով հավերժության մարմնի վրա: Ուրեմն՝ ո՞վ ես դու: Պլագիատ, գոյագողություն, անմեղսունակ կրկնություն... Դու շարունակում ես քայլել... Ոչ, քայլդ արդեն փութաշարժ է և միաժամանակ ծույլ: Այդ պարադոքսի մեջ երկար կմնաս, շաա՛տ երկար...»:

Աղասի Այվազյան` «Օրհաս»

Արձակագիր, դրամատուրգ, հրապարակախոս, սցենարիստ, ռեժիսոր, խմբագիր և գեղանկարիչ Աղասի Այվազյանը 1935 թ. սեպտեմբերի 7-ին, Վրաստանի Աբասթուման ավանում։ 1942 թ. սովորել է Թիֆլիսի գեղարվեստական ակադեմիայում, ապա` Թիֆլիսի պետական համալսարանի բանասիրական ֆակուլտետում, 1945-48 թթ` Երևանի գեղարվեստա-թատերական և ֆիզիկական կուլտուրայի ինստիտուտներում: Տարբեր հիմնարկություններում աշխատել է որպես նկարիչ-մուլտիպլիկատոր, գծագրող, կոնստրուկտոր, լրագրող։ 1965-73 թթ եղել է «Գրական» թերթի արձակի բաժնի վարիչը, 1973-81 թթ` «Էկրան» ամսագրի գլխավոր խմբագիրը: Որպես ռեժիսոր, աշխատել է «Հայֆիլմ» կինոստուդիայում: 1967 թ. «Հայֆիլմ» կինոստուդիան նրա սցենարով նկարահանել է «Եռանկյունի» կինոնկարը, որը երկրորդ մրցանակ է շահել 1968 թ. լենինգրադյան համամիութենական փառատոնում: 90-ականներին խմբագրել է «Հայություն» շաբաթաթերթը: Նրա սցենարով նկարահանվել է «Հայրիկ», «Լիրիկական երթ» գեղարվեստական կինոնկարները, որի ռեժիսորը եղել է ինքը: 1975 թ. արժանացել է ՀԽՍՀ պետական մրցանակի դափնեկրի, 1982 թ.` ՀԽՍՀ արվեստի վաստակավոր գործչի կոչումներին: 1963 թվականից եղել է ԽՍՀՄ գրողների միության անդամ:

Մահացել է 2007 թ. նոյեմբերի 21-ին, Երևանում: