Առավոտյան վաղ արթնանալ չկարողանալը ուղեղի առանձնահատկություն է. գիտնականներ

Գերմանացի գիտնականները ապացուցել են, որ «արտույտ» կամ «բու» լինելը, այսինքն` առավոտ վաղ արթնանալու կամ  գիշերը ուշ քնելու երևույթը առանձին անհատի ազատ ընտրությունը կամ դաստիարակության և սովորույթի հարց չէ, այլ գլխուղեղի կառուցվածքի առանձնահատկություն է: 

Գիտնականները բացահայտել են, որ ուշ քնող մարդկանց մոտ գլխավորապես հաստ իզոլացնող հյուսվածքներից բաղկացած ուղեղի սպիտակ նյութի ամբողջականությունն ավելի ցածր է, իսկ այդ հյուսվածքները արագացնում են նյրադային ազդակների փոխանցումը:

Այս հատկությունը նկատվում է ուղեղի այն հատվածներում, որոնք պատասխանատու են մարդկանց մոտ դեպրեսիայի առաջացման համար: Ի միջի այլոց հետազոտությունները նաև նշում են, որ հենց «բու» տեսակի մարդիկ են առավել հակված վատ տրամադրության, հոգնածության, ծխելուն կամ ալկոհոլի օգտագործմանը, մեջբերում է Korrespondent-ը: 

Գիտնակաների կարծիքով` դա պայմանավորված է այն հանգամանքով, որ այդ քրոնոտիպի մարդիկ տառապում են կենսաբանական ռիթմի խանգարումներով:

Իրենց տեսությունը գերմանացի գիտնականները ստուգել են գործնականում: Մագնիտա-ռեզոնանսային տամոգրաֆի միջոցով հետազոտվել է 16 «արտույտի» և 23 «բուի» և 20 այսպես կոչված միջին քրոնոտոպի պատկանող մարդկանց ուղեղը: Դրա արդյունքում հայտնաբերվել է առաջին ֆիզիկական տարբերությունը տարբեր քրոնոտիպերի պատլանող մարդկանց ուղեղներում: 

Հետազոտության հեղինակները կարծում են, որ պետք չէ «բուերին» ստիպել փոխվել: Առավել արդյունավետ կլինի փորձել հարմարեցնել աշխատանքային գրաֆիկն այնպես, որ այն համընկնի մարդու բնական առույգ ժամանակահատվածին: Չնայած որոշ գիտնականներ էլ կարծում են, որ ինչ-որ չափով քրոնոտիպը փոխել հնարավոր է: 

Նրանք ապացուցել են, որ այն «բուերը», ովքեր ավելի քիչ ժամանակ են անկացնում արհեստական լույսի ներքո և առավել հաճախ լինում արևի լույսի տակ, կարողանում են փոխել իրենց կենսաբանական ժամացույցը այն մոտեցնելով «արտույտներին»: