Շիմոն Պերեսի հրաժեշտի արարողություններին կմասնակցեն Երուսաղեմի Հայոց պատրիարքության ներկայացուցիչները

Իսրայելի նախկին նախագահ Շիմոն Պերեսի հուղարկավորության և վերջին հրաժեշտի արարողություններին Երուսաղեմի Հայոց պատրիարքությունից կմասնակցեն պատրիարքության դիվանապետ Կորյուն վարդապետ Բաղդասարյանը և ավագ թարգման Համբարձում վարդապետ Քեշիշյանը:

Այս մասին նշել է Երուսաղեմի Հայոց պատրիարքության դիվանապետ Կորյուն վարդապետ Բաղդասարյանը: Նրա խոսքով` Պերեսը բավականին լավ հարաբերություններ է ունեցել պատրիարքության հետ: «1988թ-ին, երբ Գյումրիում տեղի ունեցավ երկրաշարժը, Պերեսն անձամբ այցելեց պատրիարքություն և մոտ 10000 շեկելի անձնական նվիրատվություն կատարեց»,- նշեց Կորյուն վարդապետ Բաղդասարյանը:

Իսրայելի հայ համայնքը, սակայն, Պերեսին կհիշի նաև որպես Հայոց ցեղասպանությունը չընդունող անձնավորություն: «Արմենպրես»-ի հետ զրույցում Հայ դատի Երուսաղեմի հանձնախմբի ատենապետ Հակոբ Սևանը նշեց, որ Պերեսը գտնում էր, որ Հայոց ցեղասպանությունը և հրեական Հոլոքոստը չի կարելի համեմատել:

Կորյուն վարդապետ Բաղդասարյանն էլ հիշատակեց, որ 2002թ-ին Պերեսն այցելել է Թուրքիա և խոսել նման համեմատականի անընդունելիության մասին' Հայոց ցեղասպանության առնչությամբ չօգտագործելով «ցեղասպանություն» եզրը:

Կյանքի 94-րդ տարում սեպտեմբերի 28-ին մահացել է Իսրայելի նախկին նախագահ Շիմոն Պերեսը: Այս մասին հիվանդանոցում լրագրողներին հայտնել է նրա որդին' Նեհեմիա Պերեսը:

Շիմոն Պերեսը սեպտեմբերի 13-ին տեղափոխվել էր հիվանդանոցի ինտենսիվ թերապիայի պալատ: Համակարգչային տոմոգրաֆիան նրա մոտ գլխուղեղի արյունազեղում էր ցույց տվել: Որոշվել էր հիվանդին արհեստական կոմայի մեջ մտցնել: Սեպտեմբերի 27-ին բժիշկները հայտնել են Պերեսի վիճակի կտրուկ վատացման մասին:

Հրեա ժողովրդի ականավոր քաղաքական գործիչ, Իսրայելի Պետության նախկին նախագահ, Խաղաղության Նոբելյան մրցանակակիր Շիմոն Պերեսի մահվան կապակցությամբ Իսրայելի Պետության նախագահ Ռեուվեն Ռիվլինին ցավակցական հեռագիր է հղել նաև Հայաստանի Հանրապետության Նախագահ Սերժ Սարգսյանը: