Քերին հնարավոր է համարել Ասադի մասնակցությունը Սիրիայի ընտրություններին

ԱՄՆ պետքարտուղար Ջոն Քերին Նյու Յորքում ՄԱԿ-ի Գլխավոր ասամբլեայի 71-րդ նստաշրջանի շրջանակներում Սիրիայի քաղաքացիական հասարակության ներկայացուցիչների հետ հանդիպմանը չի բացառել Սիրիայի նախագահ Բաշար Ասադի մասնակցությունը երկրում կայանալիք հաջորդ նախագահական ընտրություններին։ Այս մասին հայտնում է The New York Times-ը՝ հղում անելով հանդիպման ձայնագրության հատվածներին։

Պարբերականի տվյալներով՝ հանդիպման մասնակիցները «ցնցվել» էին, երբ Քերին հայտարարել էր, որ սիրիացիները պետք է գնան ընտրություններին, որոնց կմասնակցի Ասադը։ Քերին նաև հավելել է, որ ընտրությունները պետք է անցկացվեն արևմտյան և մերձավորարևելյան երկրների աջակցությամբ՝ «ամենախիստ չափանիշներով»։

Նշվում է, որ ներկաները չեն աջակցել նման նախաձեռնությանը։

Պարբերականը հստակեցնում է, որ ձայնագրության իսկությունը հաստատել են հանդիպման մի քանի մասնակիցներ։ Նշվում է նաև, որ Քերիի դիրքորոշումը չի համապատասխանում ԱՄՆ վարչակազմի պաշտոնական դիրքորոշմանը։

Քերին ձայնագրությունում նշում է, որ Սիրիայում ռմբակոծությունների շարունակման գործում ողջ խնդիրն այն է, որ Ռուսաստանն անտեսում է միջազգային իրավունքը։