Ռոբոտը Տոկիոյում օտարերկրյա զբոսաշրջիկներին կօգնի հասնել հարկավոր վայրը

Ռոբոտը, որը կարողանում է խոսել ճապոներեն, անգլերեն եւ չինարեն, օտարերկրացի եւ ճապոնացի զբոսաշրջիկներին կպատմի, թե ինչպես ավելի հեշտությամբ հասնել մինչեւ հյուրանոց եւ որտեղ թողնել ավելորդ բեռը:

Ռոբոտը գիտափորձի կարգով եռօրյա ստաժավորում կանցնի Տոկիոյի կայարանի տեղեկատվական բաժնում: Ինչպես նշում է NHK հեռուստաընկերությունը, այն հանդերձված է արհեստական ինտելեկտի գործառույթով, ակնթարթորեն ճանաչում է այն լեզուն, որով իրեն դիմել են, իսկ այնուհետեւ երկխոսութուն է վարում այդ լեզվով: Նա կարող է պատասխանել 200 հարցի, ինչպես նաեւ միաժամանակ իր պատասխանը լուսաբանել գրաֆիկորեն եւ քարտեզի վրա: Hitachi ընկերության արտադրության ռոբոտը կհուշի՝ ինչպես ավելի լավ եւ արագ հասնել հյուրանոցներ կամ մայրաքաղաքի տեսարժան վայրեր, որ հարթակում է ավելի լավ գնացք նստել եւ կհայտնի օգտակար այլ տեղեկատվություն:

Գիտափորձը պետք Է դառնա 2020 թվականի Օլիմպիադային Ճապոնիայի մայրաքաղաքի նախապատրաստման փուլերից մեկը, երբ Տոկիոյում օտարերկրյա զբոսաշրջիկների մեծ հոսք Է սպասվում:

Toyota Motor ընկերությունը հոկտեմբերի 3-ին հայտարարել է ռոբոտ-երեխայի ստեղծման մասին, որն ստացել է Kirobo Mini անվանումը: Այն նախատեսված է Ճապոնիայում անզավակ կանանց համար, որտեղ ծնելիության մակարդակի ռեկորդային անկում է դիտվում: Toyota-ի նորույթը կոչված է մեղմացնել Ճապոնիայի բացասական ժողովրդագրական միտման հետեւանքները, որը բնակչության ծերացման ցուցանիշներով առաջատարն է զարգացած երկրների շարքում:

Toyota-ի հայտարարության համաձայն՝ Kirobo Mini-ի մշակումը կարեւոր քայլ է դարձել ավելի առաջավոր ռոբոտների ստեղծման ճանապարհին, ռոբոտներ, որոնք կկարողանան ճանաչել ու արձագանքել մարդկային հույզերին:

Ճապոնիայի կառավարությունը որոշել է 2020 թվականին երկրում անցկացնել Ռոբոտների համաշխարհային գագաթնաժողով, որի շրջանակներում մեքենաները կմրցեն ճշգրտությամբ, արագությամբ եւ աշխատանքի որակով: Այդ մասին Տոկիոյում կայացած մամուլի ասուլիսում հայտարարել է էկոնոմիկայի, առեւտրի եւ արդյունաբերության նախարար Հիրոսիգե Սեկոն:

«Մենք հույս ունենք ամբողջ աշխարհից հավաքել լավագույն ռոբոտներին եւ այդ բնագավառի լավագույն գաղափարները»,-ասել է նա: Նախարարի խոսքով՝ միջոցառումը ազդակ կհաղորդի նախեւառաջ արդյունաբերության մեջ եւ կենցաղում օգտագործվող նոր սարքերի մշակմանը:

Ներկայում իշխանությունները մտադիր են որոշել այն քաղաքը, որը կընդունի Ռոբոտների համաշխարհային գագաթնաժողովը, հաղորդել է ՌԻԱ Նովոստին: