Խաղաղության Նոբելյան մրցանակն ստացել է Կոլումբիայի նախագահը

Խաղաղության 2016 թվականի Նոբելյան մրցանակն ստացել է Կոլումբիայի նախագահ Խուան Մանուել Սանտոսը «Կոլումբիայում հակամարտության կարգավորման ջանքերի համար»: Այդ մասին Օսլոյում հայտարարել է Նորվեգիայի Նոբելյան կոմիտեի նախագահ Կարին Սիսիլե Կուլման Ֆիվեն:

Հաղթողն ընտրվել Է 376 թեկնածուներից՝ 228 անձանցից եւ 148 կազմակերպություններից: Ավելի վաղ ֆավորիտների թվում նշվում էին Սիրիայում փրկարարների «Սպիտակ սաղավարտներ» կամավորական կազմակերպությունը եւ այն բանակցորդները, որոնք համաձայնագիր կնքեցին Իրանի նկատմամբ սահմանված պատժամիջոցների չեղարկման վերաբերյալ:

Անցյալ տարի Խաղաղության Նոբելյան մրցանակն ստացել է ազգային երկխոսության թունիսյան «քառյակը»՝ «2011 թվականին հասմիկների հեղափոխության արդյունքում Թունիսում պլյուրալիստական ժողովրդավարության կառուցման գործում վճռորոշ ավանդի համար»:

21-րդ դարում Խաղաղության Նոբելյան մրցանակի դափնեկիրներ են դարձել Եվրամիությունը (2012 թ.), ԱՄՆ-ի նախագահ Բարաք Օբաման (2009 թ.), ԱՄՆ-ի փոխնախագահ էլ Գորը (2007 թ.) եւ ամերիկացի քաղաքական գործիչ, իր անվան կենտրոնի ստեղծող Ջիմի Քարթերը (2002 թ.):

Խաղաղության Նոբելյան մրցանակի դափնեկիրների մեծամասնությունը՝ 17-ը, ամերիկացիներ են, եւս 11-ը՝ բրիտանացիներ:

Խաղաղության Նոբելյան մրցանակի 2016 թվականի դափնեկիրը կստանա 8 մլն շվեդական կրոն՝ (մոտավորապես 931 հազար դոլար):

Դափնեկիրների պարգեւատրման արարողությունն ավանդաբար կանցկացվի Ստոկհոլմում՝ դեկտեմբերի 10-ին՝ Նոբելյան մրցանակների հիմնադիր շվեդ ձեռնարկատեր եւ գյուտարար Ալֆրեդ Նոբելի (1833-1896) մահվան օրը, հաղորդել է «Ինտերֆաքս»-ը: