Տարեսկզբից Միջերկրական ծովով Եվրոպա են ժամանել ավելի քան 316 հազար միգրանտներ ու փախստականներ

Տարեսկզբից Միջերկրական ծովով Եվրոպա են ժամանել ավելի քան 316 հազար միգրանտներ ու փախստականներ: Այդ մասին ճեպազրույցի ընթացքում հայտարարել է Միգրացիայի միջազգային կազմակերպության (ՄՄԿ) մամուլի քարտուղար Ջոել Միլմանը:

«ՄՄԿ-ի տվյալներով՝ այս տարի եվրոպական ափեր է հասել 316 հազար 331 մարդ: Դրա հետ մեկտեղ Միջերկրական ծովը հատելու փորձ կատարելիս զոհվել կամ անհետ կորել է 3611 մարդ:

Միլմանն ընդգծել է, որ 2016 թվականի մարտի 10-ին Եվրամիության եւ Թուրքիայի միջեւ կնքված համաձայնագրի իրագործման սկսվելուց ի վեր միգրանտների ու փախստականների թվաքանակը Հունաստանում եւ արեւմտյան Բալկանների երկրներում ավելացել է 56 տոկոսով: Ընդսմին Հունաստան նոր ժամանածների թիվն ավելացել է 40 տոկոսով. այն դեպքում, երբ Բուլղարիայում աճը կազմել է 717 տոկոս՝ 863-ից մինչեւ 7070 մարդ՝ մարտի 10-ից մինչեւ սեպտեմբերի 15-ն ընկած ժամանակաշրջանում, հաղորդել է ՌԻԱ Նովոստին:

Լուսանկարը' EPA