«Հրապարակ». Նոր աղբավայրը խոստացել էին շահագործել 2024-ի օգոստոսին

«Հրապարակ» թերթը գրել է.

2014 թվականին կառավարությունը սկսեց «Կոտայքի և Գեղարքունիքի մարզերի կոշտ կենցաղային թափոնների կառավարման ծրագրի» իրականացումը: Ծրագրի ընդհանուր բյուջեն 11,0 մլն եվրո էր, որից 5,5 մլն եվրոն վարկային միջոցներից էր, իսկ 5,5 մլն եվրոն` դրամաշնորհ: 

«Կոտայքի և Գեղարքունիքի մարզերի կոշտ կենցաղային թափոնների կառավարման ծրագրի» երաշխավորը Հայաստանի կառավարությունն էր, բայց վարկառուն երկու մարզերի 12 քաղաքային համայնքներն էին՝ Կոտայքի մարզի Աբովյան, Բյուրեղավան, Եղվարդ, Ծաղկաձոր, Նոր Հաճն, Հրազդան, Չարենցավան եւ Գեղարքունիքի մարզի Սեւան, Գավառ, Մարտունի, Վարդենիս եւ Ճամբարակ համայնքները: 

Շուրջ 10 տարի Հրազդանի վարչական տարածքում կառուցվում էր այդ սանիտարական աղբավայրը, որը լառավարությունը խոստացել էր շահագործել 2024թ․ օգոստոսին։ Այսինքն՝ այսօր։ Հիմա ժամկետը կրկին անորոշ ժամանակով կհետաձգվի, քանի որ պարզ չէ, թե երբ կշահագործվի այն։ 

Այդ հարցին, թե երբ կսկսվի շահագործումը, Կոտայքի մարզպետարանի գյուղատնտեսության և շրջակա միջավայրի պահպանության վարչության պետ Մհեր Եղիազարյանը մեզ պատասխանեց. «Պետք է արդեն աղբավայրի բացումը լիներ, բայց վերջին հանդիպման ժամանակ Հրազդան համայնքի ղեկավարն իր անհանգստությունն է հայտնել, աշխատանքներ կան, որ պետք է ավարտած լինեին, բայց դեռ տեխնիկայի եւ աղբամանների խնդիրը չի լուծվել, որ լուծվի՝ սեպտեմբեր ամսին աղբավայրը կշահագործվի»: 

«Աղբատար մեքենաներ պետք է ձեռք բերվեն, որ սպասարկվի: Մեր տեղեկություններով՝ այդ մեքենաները սահմանին են, մաքսազերծման փուլում են: Նաեւ պետք է աղբամանների համար նախատեսված վայրերը ձեւափոխվեն, փակ տարածքներ պետք է լինեն: Քաղաքապետը միշտ էլ բարձրաձայնել է խնդիրը: 1 ամիս առաջ ենք հանդիպել, այդ հարցերը քննարկել»,- ասացին Հրազդանի համայնքապետարանից: 

Ծրագրի իրականացման ընթացքից դատելով՝ քիչ հավանական է, որ աղբավայրը շահագործվի 2024-ին: «Կոտայքի եւ Գեղարքունիքի մարզերի կոշտ կենցաղային թափոնների կառավարման ծրագրով»` միջազգային մրցույթը շահած վրացական ընկերությունը խոստացել է «Ռենո» մակնիշի աղբատար մեքենաների ներկրումը սկսել փետրվարին, պայմանագրի վերջնաժամկետն օգոստոսն է: 

«Այս ծրագրի վերահսկողությունը տարածքային կառավարման նախարարությունն է իրականացնում: Մեր ընկերությունը միջհամայնքային ընկերություն է, որը ստեղծվել է ծրագրի շրջանակներում: Բոլոր համայնքները մեկ ընկերություն կշահագործի եւ կիրականացնի աղբահանությունը: Բուն ծրագրի մեկնարկի հետ կապված պրոցեսն ընթանում է: Աղբատար մեքենաներն այս պահին Գյումրու մաքսատանն են, սպասում ենք, որ մաքսազերծում իրականացվի, որպեսզի տեղափոխենք: Իսկ աղբամանները նոր են սկսել մատակարարել, այդ ամենը կնքված պայմանագրերի համաձայն է եղել: Աղբամանների մատակարարման վերջնաժամկետը նոյեմբեր ամիսն է: Որպեսզի մենք մեր գործունեությունը սկսենք, եւ սանիտարական աղբավայրը սկսի շահագործվել, անհրաժեշտ է, որ ընկերությունը վերազինվի տեխնիկայով եւ անձնակազմով, ընկերության բյուջեն հաստատվի, եւ կսկսենք աշխատել»,-մեզ հետ զրույցում ասաց «Կոտայքի և Գեղարքունիքի մարզերի կոշտ կենցաղային թափոնների կառավարում» ՍՊԸ-ի տնօրեն Սերգեյ Համբարձումյանը։

Ընկերության կողմից 2 մարզի բոլոր համայնքների աղբահանության համար ձեռք է բերվել 28 աղբատար մեքենա, որի գումարը կազմում է 4 մլն 385 հազար եվրո, եւ 7000 աղբաման, ըստ պայմանագրի՝ 1մլն 171 հազար եվրո արժողությամբ: «ՏԻՄ օրենքով՝ աղբահանությունը պետք է իրականացնի համայնքը՝ ՀՈԱԿ-ների միջոցով: Մեր պարագայում բոլոր համայնքները միավորվել են եւ ստեղծել են 1 ընկերություն՝ միջհամայնքային կազմակերպություն, որը պետք է իրականացնի աղբահանությունը: Համայնքները նույն ձեւով վարձավճարները կհավաքագրեն եւ կփոխանցեն մեր ընկերությանը: Մեր աշխատանքն անխափան լինելու համար բոլոր համայնքների հետ պայմանագրեր կկնքվեն, եւ ըստ բնակչության թվի՝ կորոշվի սակագինը»,- ասաց Սերգեյ Համբարձումյանը: 
Իսկ աղբի վարձավճարը կթանկանա՞: «Բնականաբար, մենք ծառայություն ենք մատուցում, մի քանի անգամ այլ մակարդակի ծառայություն ենք իրականացնում: Մենք տեղադրելու ենք նոր աղբամաններ, դրանց համար նոր հարթակներ են լինելու»: 

Կարո՞ղ եք հստակ ժամկետ ասել, թե երբ կշահագործվի աղբավայրը: «Հստակ չեմ կարող ասել աղբավայրի շահագործման ժամկետը, որքան շուտ վերազինվենք համապատասխան տեխնիկայով եւ աշխատակիցներով, այդքան հնարավոր կլինի շուտ շահագործել աղբավայրը»: