Ոչ մեկ թող ինձ Արցախը սիրել չսովորեցնի․ Քոլոյանի կինը մեկնաբանել է արցախցիների վերաբերյալ իր վիրավորական խոսքերը․ Mediahub

Mediahub-ը գրում է․

«Հանրային ռադիոյի տնօրեն Արմեն Քոլոյանը լրատվամիջոցների կողմից չափազանց «սիրված է»: Իր պաշտոնը ստանձնելու առաջին իսկ օրվանից նա արեց ամենը, որ թե՛ խմբագրակազմը իրեն չընդունի, թե՛ լրագրողական համայնքը, թե՛ հանրությունը. Հանրային ռադիոյի տնօրենը գեներացրել ու շարունակում է գեներացնել իր հանդեպ հանրային, մեղմ ասած, վատ տրամադրություններ, ընդ որում լիովին արդարացված:

Այսօր, սակայն, հերոսը ոչ թե ինքն է, այլ իր տիկինը, ով խորը ատելությամբ ատելության խոսք է տարածել արցախցիների հասցեին: Ինչի՞ց է պատմությունը սկսվել. Քոլոյանի կինը որոշել է խրատական դասեր տալ արցախցիներին, որոնք պայքարում են իրենց իրավունքների համար:

Մասնավորապես, շաբաթ օրը Ազատության հրապարակում կայացած հանրահավաքի թեմային նվիրված ֆեյսբուքյան քննարկումներից մեկի տակ արձագանքել է արցախցիներից մեկին։ «Բայց ում դեմ եք միավորվել: Մեր հացը լափում եք, մեր դեմ միավորվո՞ւմ: Դուք մեկի հետ յոլա գնալ կարո՞ղ եք: Աստծուց մոռացված դժբախտներ»,- գրել է Շուշան Ղազարյանը:

Այո, «իրերը» կոչենք իրենց անուններով. Արմեն Քոլոյանի կնոջ անունը Շուշան Ղազարյան է, նա այլևս անուն ազգանունով պետք է ճանաչելի լինի հանրությանը և հանրությունը պետք է իմանա, որ կյանքի մեծ մասը ամուսնու հետ Պրահայում անցկացրած տիկինը, որ Հայաստանում հայտնվել է միայն Քոլոյանի այստեղ պաշտոնի անցնելու կապակցությամբ, արցախցիներին իրենց հայրենիքում որակում է «հաց լափողներ»: Հարց տիկնոջը՝ սեփական փորձի՞ց եք նման որակումներ տալիս... ինչևէ, անցնենք բուն թեմային:

MediaHub-ը արդեն փորձ ունի Արմեն Քոլոյանի հետ շփումների, վերջինիս կողմից ամեն անգամ ինչ-որ սկանդալային պատմության մեջ հայտնվելուց հետո: Այս անգամ էլ կապ հաստատեցինք, բայց ոչ թե այն նպատակով, որ հասկանանք, թե արդյո՞ք կնոջ անհարիր բառապաշարը քննադատում է կամ դատապարտում, քանզի հաստատ դա այդպես չէր կարող լինել, այլ՝ որքանո՞վ է համաձայն այդ որակման հետ:

Քոլոյանն էլ արձագանքեց. «Ես ընդհանրապես չեմ հետևում «ֆեյսբուքներին», չգիտեմ ինչ է գրել, զանգահարեք իր հետ խոսեք, ես կապ չունեմ դրա հետ»:

Քոլոյանից, այդուհանդերձ, հարցրեցինք՝ կո՞ղմ է կնոջ նման պահվածքին, մանավանդ, որ թիրախում Արցախի իր հայրենակիցներն են, այլ ոչ թե ամեն օր հրադադարի ռեժիմը խախտող, սահմանամերձ բնակավայրերի մարդանց ահաբեկող թշնամին։ 

«Մատաղ ինիմ, ես ինքս Արցախից եմ, գիտե՞ս, դե ուրեմն հաջողություն»,- ասաց ռադիոյի տնօրենն ու անջատեց հեռախոսը։

Այստեղ մեր կողմից միայն ավելացնենք, քանզի Քոլոյանը անջատեց հեռախոսը։ «Խեղճ ինիս իմ Արցախ, վեր ստի զավակ օնիս․․․»:

Հուսանք՝ կկարդա, թեև դժվար թե ընկալի այս արտահայտության խորությունը....

Եվ այսպես, իր իսկ հորդորով կապ հաստատեցինք նաև Քոլոյանի տիկնոջ հետ: Հիշեցնենք ևս մեկ անգամ, որ օգտատեր Անուշն իր ֆեյսբուքյան էջում ընդամենը գրել էր՝ «Միասնությունն այսպես է լինում», և հեռախոսով ուղիղ հեռարձակում է ապահովել հանրահավաքից, իսկ Պրահայի բարիքները թողած ու Հայաստան տեղափոխված տիկինը, որ նույն այդ Հայաստանի հացը տարիներով և գուցե տասնամյակներով չէր կերել, մեղադրել էր նրան «մեր հացը լափելու» մեջ և անվանել «Աստծուց մոռացված դժբախտներ»: 

«Ես Արցախի համար իմ կյանքն ու ընտանիքն եմ վտանգել, իմ կյանքն եմ նվիրել ու ոչ մեկ թող ինձ Արցախը սիրել չսովորեցնի։ Ինձ ճանաչողները գիտեն, թե ինչ է նշանակում Արցախն ինձ համար եւ Արցախի իրական հերոսները նույնպես։ Ես ավելին չեմ կարող ասել մարդկանց, ում առաջ մեր սիրտն ու գիրկն ենք բացել, բայց ովքեր հրապարակներում թքում են իմ պետության ու մեր սրտին»,- արձագանքել է նա մեր հարցին։ 

Հարցրինք՝ իսկ ի՞նչ է հնչել հանրահավաքի օրը Ազատության հրապարակում, որ դուր չի եկել տիկին Ղազարյանին: Այս հարցը, սակայն, վերջինս արդեն թողեց անպատասխան:

Քոլոյանի Հանրային ռադիոյում հայտնվելը, ինչպես ցույց տվեց ժամանակը, թերևս ամենավատ բանն էր, որ կարող էր լինել այս լրատվամիջոցի հետ, որը միշտ համարվել է պրոֆեսիոնալներով համալրված ու ուրույն ձեռագիր ունեցող և մշտապես լավ իմաստով տարբերվել է «մեծ եղբորից»՝ Հ1-ից: Թշնամի Բաքվի ու Անկարայի ժամացույցների հայտնվելը ռադիոյի պատին, Արցախի դրոշի հեռացումը շենքի դիմացից, Արցախի հիշատակումը եթերից գրեթե վերացնելը, ներքին խմորումները, որոնց մասին պարբերաբար գրում է մամուլը, ահա ատելության խոսքի տարածում սեփական կնոջ կողմից և դա չդատապարտելը.... ինչո՞վ է  հաջորդը աչքի ընկնելու Քոլոյանը:

Մեր կողմից այլ մեկնաբանություններ չեն լինի, դրանք թողնում ենք ընթերցողներին: Քոլոյանը, վստահ ենք, անձամբ կծանոթանա օգտատերերի կողմից իր կնոջը թողնված «ջերմ» մեկնաբանություններին և հորդորին՝ «Քոլոյան, կնոջդ կարգի հրավիրի՛»»: