Տղամարդը երեք անգամ ապահովագրել է մոր կյանքը, ապա սպանել նրան փողի համար

Ավստրալիայում 29-ամյա Անդրե Ռեբելոն երեք անգամ ապահովագրել է 58-ամյա մոր կյանքը, կեղծել կտակը, ապա փողի համար սպանել նրան։ Այս մասին հայտնում է ABC News-ը։

Միջադեպը տեղի է ունեցել 2020 թվականին Պերտ քաղաքում։ Կնոջ մարմինը ցնցուղի տակ հայտնաբերել է կրտսեր որդին, ով այդ պահին ապրում էր մոր հետ:

Կնոջ մահից երեք օր անց ավագ որդին փորձել է ստանալ ապահովագրության գումարը։ Այս տեղեկությունը ապահովագրական ընկերությունն ուղարկել է ոստիկանություն։ Իրավապահները սկսել են ուսումնասիրել գործը և պարզել, որ ողբերգությունից մեկ շաբաթ առաջ կինը երեք անգամ ապահովագրվել է։ Դրանց համար, ընդհանուր առմամբ, Ռեբելոն պետք է ստանար մոտ 1 մլն դոլար։

Տղամարդը խոստովանել է, որ կեղծել է մոր փաստաթղթերը և պնդել, որ կապ չունի նրա մահվան հետ։ Այնուամենայնիվ, դատարանը բավարար ապացույցներ է հավաքել տղամարդուն պատասխանատվության ենթարկելու համար։ Նա 25 տարի կանցկացնի բանտում՝ նախքան պայմանական վաղաժամկետ ազատման իրավունք ստանալը։