Մասնագետները բացատրել են, թե ինչու է սխտորը անօգուտ մրսածության դեմ պայքարում

Որոշ սննդամթերքներ, ինչպիսիք են նարինջը կամ սխտորը, չեն կարողանում մեղմել մրսածության ախտանիշները, չնայած իմունոմոդուլյատոր հատկություններ ունենալուն։ Այս մասին զգուշացրել է Սվինբուրնի համալսարանի (Ավստրալիա) սննդաբան Նինա Իմադը։ Մասնագետի խոսքերը մեջբերել է Medical Xpress-ը։

Մասնագետի խոսքով՝ չկա «կախարդական» սննդամթերք, որը կարող է արագորեն ամրապնդել իմունային համակարգը։ Բժիշկը նշել է, որ առողջ իմունային համակարգի ձևավորումը տևում է մեկ օրից ավելի։ Դրա աշխատանքը պահպանելու համար անհրաժեշտ է կանոնավոր քուն, ֆիզիկական ակտիվություն, սթրեսին դիմակայելու ունակություն և սննդակարգի բազմազանություն։

«Նարինջը և վիտամին C-ի այլ աղբյուրները, այդ թվում՝ կիվին, հատապտուղները, բրոկկոլին և կանաչեղենը, իսկապես օգտակար են, բայց ասկորբինաթթվի ընդունումը մրսածության ախտանիշների ի հայտ գալուց հետո չի տալիս արտահայտված ազդեցություն։ Միայն կանոնավոր օգտագործումը կարող է փոքր-ինչ կրճատել հիվանդության տևողությունը», - բացատրել է սննդաբանը։

Բժիշկը հավելել է, որ որոշ ուսումնասիրություններ ցույց են տալիս սխտորի իմունոմոդուլյատոր ազդեցությունները։ Սակայն չկան համոզիչ ապացույցներ դրա վրա հիմնված սննդային հավելումների արդյունավետության մասին մրսածության դեմ պայքարում։

«Ցինկը կարող է շատ օգտակար լինել: Հիվանդության սկզբում ցինկի հավելումներ ընդունելը կարող է կրճատել դրա տևողությունը: Ցինկի լավ բնական աղբյուրներ են միսը, խեցգետինները, լոբազգիները, ընկույզները, սերմերը և կաթնամթերքը», - բացատրեց բժիշկը։

Բժիշկ Իմադը հավելեց, որ մրսածությունից պաշտպանվելու համար կարևոր է խուսափել օրգանիզմում վիտամին D-ի անբավարարությունից: Այս վիտամինը կարևոր է իմունային համակարգի բնականոն գործունեության համար: Այն պարունակվում է ճարպոտ ձկան, ձվի, սնկերի, լյարդի և հատուկ հարստացված կաթի մեջ:

Թարգմանությունը՝ Lurer.com-ի