Եթե Իսրայելը կրկին հարձակվի, Իրանը կպատասխանի․ նախագահ Փեզեշքիան

Իրանը պատրաստ է հարվածել Իսրայելին, եթե նա որոշի վերսկսել հարձակումները Իսլամական Հանրապետության տարածքի վրա։ Այս մասին հայտարարել է Իրանի նախագահ Մասուդ Փեզեշքիանը համաարաբական Al Jazeera  հեռուստաալիքին տված հարցազրույցում։

Նա նշել է, որ Իրանը պատրաստ է հրեական պետության կողմից ցանկացած ռազմական գործողության և կարող է կրկին հարված հասցնել Իսրայելի տարածքի խորքը։

Փեզեշքիանը հիշեցրել է, որ հունիսին Իրանը Իսրայելի հարձակումներին պատասխանել է հզոր հարվածներով։ Նա ընդգծել է, որ Թեհրանը չի ձգտում պատերազմի, բայց, միևնույն ժամանակ, չի սպասում, որ հրադադարը մշտական կլինի։