Ի՞նչ է սպասվում ԱՄՆ միջանկյալ ընտրություններում․ երեք հնարավոր զարգացում

ԱՄՆ-ում միջանկյալ ընտրությունների օրը մեկնարկել է՝ ամիսներ տևած քարոզարշավից և միլիարդավոր դոլարների ծախսերից հետո։ Վերջին հանրային հարցումների համաձայն՝ Դեմոկրատական կուսակցությունը որոշակի առավելություն ունի, սակայն նախորդ ընտրությունները ցույց են տվել, որ հարցումները միշտ չէ, որ ճշգրիտ են կանխատեսում արդյունքները։ BBC-ն ներկայացնում է ընտրությունների հնարավոր երեք հիմնական սցենար։

Առաջին սցենարը Դեմոկրատների խոշոր հաղթանակն է։ Այս դեպքում նրանք ոչ միայն կվերահսկեն Ներկայացուցիչների պալատը, այլև զգալիորեն կգերազանցեն մեծամասնության համար անհրաժեշտ 218 մանդատի շեմը։ Դեմոկրատները կարող են հաջողության հասնել նաև Սենատի մի շարք մրցապայքարներում, այդ թվում՝ ավանդաբար հանրապետական նահանգներում։ Նման արդյունքը լուրջ հարված կլինի Դոնալդ Թրամփին և Հանրապետական կուսակցությանը և կարող է առաջիկա երկու տարիներին խորացնել նախագահի ու Կոնգրեսի միջև քաղաքական հակասությունները։

Երկրորդ տարբերակը Դեմոկրատների սահմանափակ առաջխաղացումն է։ Այս դեպքում նրանք կկարողանան Ներկայացուցիչների պալատում ձևավորել մեծամասնություն, սակայն այն կլինի փոքր, ինչի հետևանքով կուսակցության ղեկավարությունը հաճախ ստիպված կլինի համաձայնության գալ ինչպես ձախ, այնպես էլ կենտրոնամետ թևերի ներկայացուցիչների հետ։ Սենատում Դեմոկրատները կարող են ստանալ ընդամենը մեկ կամ երկու լրացուցիչ տեղ։ Արդյունքում Կոնգրեսում կարող է ձևավորվել քաղաքական բաժանում, ինչը կբարդացնի օրենսդրական աշխատանքը։

Երրորդ սցենարը Հանրապետական կուսակցության հաջողությունն է։ Այս դեպքում հանրապետականները կպահպանեն վերահսկողությունը Կոնգրեսի երկու պալատների նկատմամբ։ Դրա համար անհրաժեշտ կլինի, որ հարցումները սխալվեն, իսկ սահմանային համարվող մրցապայքարների մեծ մասը ավարտվի հանրապետականների օգտին։ Հանրապետականների բարձր մասնակցությունը, ինչպես նաև անկախ և իսպանախոս ընտրողների աջակցությունը կարող են վճռորոշ լինել։

Եթե այս սցենարն իրականանա, Թրամփը կարող է հայտարարել, որ ընտրությունների արդյունքները հաստատում են իր քաղաքականության շարունակությունը և առաջ տանել իր ներքին ու արտաքին օրակարգը՝ Հանրապետական կուսակցության վերահսկողության տակ գտնվող Կոնգրեսի աջակցությամբ։ Ընտրությունների առաջին արդյունքները կարող են որոշակի պատկեր տալ, թե երեք սցենարներից որն է սկսում իրականություն դառնալ։