Տալարիկոն 1988 թվականից ի վեր առաջին դեմոկրատն է, որը հաղթել է Տեխասի Սենատի ընտրություններում

ԱՄՆ Տեխաս նահանգում Դեմոկրատական կուսակցության թեկնածու Ջեյմս Տալարիկոն հաղթել է Սենատի ընտրություններում՝ պարտության մատնելով հանրապետական Քեն Փաքսթոնին։ BBC-ի հաղորդմամբ՝ սա 1988 թվականից ի վեր առաջին դեպքն է, երբ դեմոկրատ թեկնածուն հաղթում է Տեխասում ԱՄՆ Սենատի ընտրություններում։

Նախկին ուսուցիչ Տալարիկոն մինչև անցյալ տարի համեմատաբար քիչ հայտնի քաղաքական գործիչ էր։ Իր նախընտրական քարոզարշավի ընթացքում նա հիմնական շեշտը դրել է հանրապետականների կառավարման պայմաններում կյանքի թանկացման վրա։ Նրա մրցակից Փաքսթոնը, հակառակը, փորձել է Տալարիկոյի հայացքները ներկայացնել որպես նահանգի ընտրողների համար չափազանց առաջադեմ՝ միաժամանակ քարոզարշավ իրականացնելով ԱՄՆ նախագահ Դոնալդ Թրամփի հետ։

Հաղթանակից հետո Տալարիկոն հայտարարել է, որ իրենց հաջողվել է վերադարձնել Տեխասը՝ ընդգծելով, որ իր հաղթանակը ցույց է տալիս՝ ֆինանսական մեծ միջոցները չեն կարող գերազանցել նահանգի բնակիչների կամքը։ Նրա քարոզարշավին աջակցել է նաև Բուշերի ընտանիքի երկու ներկայացուցիչ, ինչը դիտարկվել է որպես ուշագրավ քայլ՝ հաշվի առնելով այդ ընտանիքի հանրապետական քաղաքական անցյալը։

Ընտրապայքարը դարձել է ԱՄՆ Սենատի ընտրությունների պատմության մեջ ամենաթանկերից մեկը․ ծախսերը գերազանցել են կես միլիարդ դոլարը։ Միլիարդատեր Իլոն Մասկը Փաքսթոնին աջակցող քաղաքական կազմակերպությանը հատկացրել է 158 միլիոն դոլար։ Միևնույն ժամանակ, Տալարիկոն քարոզարշավի ընթացքում պահպանել է բարձր ցուցանիշներ հարցումներում՝ չնայած նրա դեմ ուղղված բացասական գովազդային արշավին։

Տեխասը տասնամյակներ շարունակ համարվել է հանրապետականների հենակետը։ Սակայն ընտրություններից առաջ հարցումները ցույց էին տալիս, որ դեմոկրատ թեկնածուն կարողանում է գրավել ընտրողների ուշադրությունը։ Քաղաքագետ Քուադրիկոս Դրիսկելը BBC-ի հետ զրույցում Տեխասում դեմոկրատների հաջողությունը, ինչպես նաև նահանգապետ Գրեգ Էբոթի պարտությունը բնութագրել է որպես պատմական իրադարձություն։

Ընտրողների դժգոհության պատճառներից են եղել ապրանքների և վառելիքի բարձր գները։ BBC-ի փոխանցմամբ՝ շատ ընտրողներ թանկացումը կապել են Թրամփի մաքսատուրքերի քաղաքականության և Իրանի հետ պատերազմի հետ։ Դժգոհություն է նկատվել նաև ներգաղթի քաղաքականության շուրջ։ Մասնավորապես, նահանգի բնակչության շուրջ մեկ երրորդը կազմող իսպանախոս ընտրողների շրջանում Թրամփի աջակցությունը զգալիորեն նվազել է, և հարցումները ցույց են տվել, որ նրանց մեծ մասը սկսել է նախապատվությունը տալ դեմոկրատներին։