Սևանի ջուր՝ ազգային հարստություն. մեկին՝ անվճար, մեկին՝ վճարովի՞. Նիկոլ Փաշինյան

ՀԱԿ պատգամավոր Նիկոլ Փաշինյանը անդրադարձավ «Սևանա լճի մասին» եւ «Սևանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան եւ համալիր ծրագրերը հաստատելու մասին» ՀՀ օրենքներում լրացումներ կատարելու օրենքների նախագծերի փաթեթին։

«Ի՞նչ հասկացա ես Սևանա լճից հավելյալ 150 մլն խորանարդ մետր ջուր բաց թողնելու Կառավարության առաջարկի քննարկման ժամանակ. նույն Կառավարությունն ընդամենը երկուսից երեք ամիս առաջ հայտարարում էր հեղեղների վտանգի մասին և նույնիսկ Կառավարության որոշումներով մի քանի համայնքների բյուջետային միջոցներ էրտրամադրել հեղեղումներից պաշտպանվելու գործն իրականացնելու համար։ Հեղեղումների դեպքեր այդպես էլ տեղի չունեցան։ 

Երկրորդ փաստը. ՀՀ օրենդրության տրամաբանությամբ, մինչև Սևանի ջրերի օգտագործելու Կառավարությունը պարտավոր է Ջրային օրենսգրքի 92 հոդվածի համապատասխան որոշում կայացնել սակավաջրության և երաշտի հետ կապված ՀՀ-ի ամբողջ տարածքում կամ դրա որոշակի հատվածներում միջոցներ սահմանել ջրային ռեսուրսների խնայողական օգտագործումը կազմակերպելու համար։ Սակայն Կառավարությունը ոչ մի միջոց չի իրականացրել, այսինքն՝ նվազագույնը գործ ունենք անփութության հետ, ավելին՝ հանցավոր անփութության հետ։  

Փաստորեն, Կառավարությունը մտադիր է ջուրը վաճառել գյուղացիներին, որոնցից շատերը ճռռում են ոռոգման ջրի կուտակված պարտքերից, ինչպես նաև 150 մլն խորանարդ մետր ջուր նվիրաբերել Սևան-Հրազդան հիդրոէլեկտրակայանին, որի արդյունքում միլիոնների շահույթներ կապահովեն»։

Հղում անելով Անդրանիկ Անդրեասյանի այն խոսքին, թե Սևանի ջուրը մեր ազգային հարստությունն է՝ Նիկոլ Փաշինյանը չի հասկանում, թե ինչպես է ազգային հարստությունը մի կողմից նվիրաբերվում էլէկտրաէնէրգիա արտադրող ընկերություններին, մյուս կողմից՝ վաճառվում գյուղացիներին։

Նրա կարծիքով, օրենքի նախագիծը պարունակում է կոռուպցիոն մեծ ռիսկեր և օգուտ կբերի միայն ու միայն անհատ մարդկանց։ Նիկոլ Փաշինյանը առաջարկում է ԱԺ-ի գյուղատնտեսական և բնապահպանական գործերի, ինչպես նաև տարածքային կառավարման և տեղական ինքնակառավարման հարցերի մշտական հանձնաժողովների օգնությամբ ստեղծել աշխատանքային խումբ, որում կընդգրկվեն նաև խորհրդարանական բոլոր ուժերը, որոնք կլինեն Սևանում, կուսումնասիրեն իրավիճակը և եզրակացություն կներկայացնեն ԱԺ-ին Սևանին սպառնացող վտանգների մասին։