Շտապօգնության աշխատակիցները ահազանգում են, տնօրենը՝ հերքում

Երևանի շտապ բժշկական օգնության կենտրոնի բուժանձնակազմի որոշ ներկայացուցչներ մեր խմբագրություն նամակ են ուղարկել, որում ասվում է, որ կենտրոնի տնօրեն Թագուհի Ստեփանյանը նրանից շատերին կանչում է իր մոտ, սպառնում, այնուհետև խնդրում, որպեսզի ոչ մի բողոք չարտահայտեն գործելաոճի վերաբերյալ:

Նախ նշենք, որ շտապօգնության աշխատակիցները վերջերս անընդհատ բողոքի ակցիաներ են իրականացնում բուժկենտրոնում՝ պահանջելով աշխատավարձերի բարձրացում, ապահովագրություն, 24-ժամյա ռեժիմով աշխատանքին համարժեք վարձատրություն, ընդմիջման ժամերի տրամադրում, համապատասխան հագուստների խնդրի լուծում: 

Աշխատակիցներն անգամ ստորագրահավաք են կազմակերպել, որոնք, ըստ աշխատակիցների, ոչնչացվել են տնօրենի կողմից: Ավելին, նշվում է, որ տնօրեն Թագուհի Ստեփանյանը, մասնավորապես, երիտասարդ կադրերին իր մոտ է կանչում և ստիպում լուռ մնալ՝ սպառնալով զրկել աշխատանքից: 

Թեմայի վերաբերյալ փորձեցին ստանալ նաև Թագուհի Ստեփանյանի կարծիքը և նա լսելով մեր հարցադրումները, միանգամից հերքեց դրանք, ասելով որ բացահայտ ստեր են:

«Դրանք իրականությանը համապատասխանել չեն կարող, քանի որ մեզ մոտ աշխատանքային մթնոլորտ է: Բնականոն հունով աշխատում ենք, ո՞վ է նման ապատեղեկատվություն տարածում»,- ԼՈՒՐԵՐ.com-ի հետ զրույցում ասաց Շտապօգնության կենտրոնի տնօրեն Թագուհի Ստեփանյանը:

Ստեփանյանը նաև հավելեց, որ քաղաքապետարանի աշխատակիցների հետ հանիպման ժամանակ եկել են այն որոշման, որ առաջիկաում կբարելավվեն աշխատակիցների աշխատավարձերը:

Արմինե  ՄԻՔԱՅԵԼՅԱՆ