Սևանա լճի խնդիրը

ՀՀ կառավարությունը լիահույս է, որ առաջիկա հինգ տարիների ընթացքում կառուցվող չորս ջրամբարների և Սևան-հրազդանյան կասկադի ներդրումային ծրագրի իրականացման արդյունքում հնարավոր կլինի Սևանա լճից ջրի բացթողումը հասցնել ներկայում գործող օրենքով սահմանված չափաքանակին: Այս մասին ԱԺ-ում խորհրադարանական լսումների ժամանակ հայտնեց Ջրային տնտեսության պետական կոմիտեի ղեկավար, ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանը:

«Օրենքում լրացումներ կատարելու մասին նախագծով մենք նաև ժամանակային փոփոխություն ենք առաջարկում, որի ընթացքում պետք է ներդրումային քայլեր իրականացվեն, մասնավորապես, ջրամբարաշինության ծրագրերը, որոնք ընթացքի մեջ են: Հուսով ենք, որ հինգ տարվա ընթացքում կառուցվելիք ջրամբարների պարագայում Սևանի բեռը էականորեն կթեթևանա: Մինչև 90 միլիոն դրամ արժողության Եղվարդի ջրամբարը կկարողանա իր վրա վերցնել այն դոտացիոն հնարավորությունը, որ մենք ուզում ենք իրագործել Սևանի հաշվին»- աս աց Անդրանիկ Անդրեասյանը:

Նրա խոսքով, երկորդ խոշոր միջոցառումը, որն արդեն սկսված է, 70 կմ դելիվացիոն համակարգի ստեղծումն է, որ սպասարկվում է Սևան-հրազգանյան կասկադի կողմից: «Այս տարվանից սկիզբ է առել ներդրումային ծրագիրը, որի արդյունքում տեխնիկական կորուստները կշտկվեն, ինչը կբերի ջրային պաշարների էական խնայողության: Դա վստահություն է ներշնչում, որ այդ միջոցառումները կտան էական արդյունք, և մենք Սևանին լրացուցիչ չենք դիմի, եթե, իհարկե, բնական կատակլիզմներ տեղի չունենան, և նորից կվերադառնանք մեր հիմնական չափաքանակին, ինչն այսօր օրենքով ֆիքսված է»,-նշեց պաշտոնյան' հավելելով, որ օրերս կհրապարակվեն եզրակացություններ Արտեզյան ավազանի հաշվեկշռի, դրա դրական դինամիկայի հետ կապված: «Հաշվի առնելով ներկայացվող եզրակացությունը` Կառավարությունը որոշակի քայլեր կանի այդ ուղղությամբ, ինչը կբերի Արտեզյան ավազանի հաշվեկշռի դրական դինամիկային, կփոփոխվեն Արտեզյան հորիզոնները, խոնավության հարաբերական մակարդակը, ինչի շնորհիվ էլ ջրի նորմաները դրականորեն կփոփոխվեն»,-հավաստեց Անդրանիկ Անդրեասյանը:

Անդրանիկ Անդրեասյանը նշեց մի քանի պատճառ, որոնք հանգեցրել են Սևանից ավելի շատ ջուր բաց թողնելու անհրաժեշտությանը: Նրա խոսքով, Էջմիածին, Մասիս, Արմավիր հատվածներում ջրային ռեսուրսների դիֆիցիտ է առաջացել, ինչի հետևանքով 30 համայնքի ավելի քան 8 հազար հեկտար ոռոգելի հող ջրամատակարարման խնդիր է ունենալու: «Լրացուցիչ պոմպակայաններ, խորքային հորերի հորատումներ են իրականացվել, որոնք մոտ 2 հազար հեկտարի վրա իրենց դրական ազդեցությունն են ունեցել, բայց 8 հազար հեկտարի դեպքում ջրի պակասորդ կա: Ինչի համար կան մի քանի պատճառ. ավանդական աղբյուրներում ունենք պակասուրդ, հողի հարաբերական խոնավության մակարդակի փոփոխություն է եղել, որի պատճառով ջրման նորմաներն են փոխվել, որոշակի տեխնիակական խնդիրներ կան Սևան-հրազդանյան կասկադում»,-նշեց պաշտոնյան:

ԱԺ գյուղատնտեսական ու բնապահպանական հարցերի մշտական հանձնաժողովը մարտի 19-ին կազմակերպել է խորհրդարանական լսումներ ՀՀ կառավարության կողմից օրենսդրական նախաձեռնությամբ ներկայացված «Սևանա լճի էկոհամակարգի վերականգնման, պահպանման, վերարտարման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին նախագծի վերաբերյալ:

Օրենքի նոր նախագծով առաջարկվում է մինչև 2019 թվականը ոռոգման նպատակներով ավելացնել բացթողումները Սևանա լճից` 170 միլիոն խորանարդ մետրից հասցնելով տարեկան 240 միլիոն խորանարդ մետրի: