Քեսաբի հարցով Ֆրանսիայի կառավարությունը հայկական կառույցների ուղարկած դիմումներն անպատասխան է թողել. Հիլդա Չոբոյան

Սիրիայում հայկական Քեսաբի լինելիությունն ապահովելու գլխավոր միջոցներից մեկը Ֆրանսիայի և Ամերիկայի Միացյալ Նահանգների միջամտությունն է, որպեսզի Թուրքիայից ներմուծված ուժերը դուրս հանվեն Քեսաբից: Նշյալ նպատակին հասնելու համար անելիք ունեն ոչ միայն սփյուռքի հայկական կառույցները, նաև Հայաստանի իշխանությունները: Մինչ այսօր Քեսաբի հարցով Ֆրանսիայի կառավարությունը հայկական կառույցների ուղարկած դիմումներն անպատասխան է թողել: «Արմենպրես»-ի հետ զրույցում այս մասին հայտնեց Ֆրանսիայի Ռոն-Ալպի տարածաշրջանային պատգամավոր Հիլդա Չոբոյանը:

-Ֆրանսիայի իշխանությունները որևէ մակարդակով պատրաստվո՞ւմ են դատապարտել քեսաբյան դեպքերը և ինչ-որ առարկայական քայլեր կարո՞ղ ենք ակնկալել:

-Ես հանդիպումներ եմ ունեցել ֆրանսիական քաղաքականության ներկայացուցիչների հետ իմ պաշտոնի շրջանակներում: Երբ Քեսաբի դեպքը պատահեց, ես Ֆրանսիայի արտաքին գործերի նախարարության ուշադրությունը հրավիրեցի այդ փաստի վրա: Դժբախտաբար, ակնհայտ է, որ ֆրանսիական իշխանություններն այս հարցին լուծում տալու համար պատրաստակամություն չեն ցուցաբերում: Գիտենք, որ եվրոպական և ֆրանսիական իշխանությունները սիրիական պատերազմի առաջին իսկ օրերից զորակցում են ընդդիմությանը և այդ հարցով հատուկ հարաբերությունների մեջ են թուրքական ուժերի և իշխանությունների հետ: Ես հակված եմ ենթադրելու, որ մեծ հավանականությամբ Քեսաբի վրա հարձակումը թուրքական իշխանության միակողմանի որոշման արդյունքը չէր և, հավանաբար, Թուրքիայի զինակիցները տեղեկացված էին այդ մասին: Հայկական Քեսաբի լինելիությունն ապահովելու գլխավոր միջոցներից մեկը Ֆրանսիայի և Ամերիկայի Միացյալ Նահանգների միջամտությունն է, որպեսզի Թուրքիայից ներմուծված ուժերը դուրս հանվեն Քեսաբից: Իշխանությունների հետ լուրջ երկխոսությունը անհրաժեշտ է մեր հիմնախնդիրները լուծելու համար, և հայ համայնքի հետ պետք է գործեն նաև Հայաստանի իշխանությունները:

-Հայկական կառույցները ինչպիսի՞ քայլեր են կատարում Եվրոպայում և, մասնավորապես, Ֆրանսիայում քեսաբահայության հարցը բարձրացնելու և դրան հնարավոր լուծում տալու համար:

-Քեսաբի հայերի հետ կատարվածը նախ ընկերական ցանցերի միջոցով արձագանք գտավ, որին հաջորդեցին մամուլի հոդվածները ֆրանսիական կարևոր օրաթերթերում: Որոշ չափով հանրությունը տեղյակ է տեղի ունեցածի մասին' չնայած վերջին օրերի քաղաքական իրադարձություններին' տեղական ինքնակառավարման մարմինների ընտրություններում իշխող կուսակցության պարտության, կառավարության փոփոխությանը և այլն:

ՀՅԴ երիտասարդական «Նոր Սերունդ» կազմակերպությունը ցույց է կազմակերպել թուրքական դեսպանատան դիմաց, որին հաջորդեցին Լիոնում և Մարսելում ցույցերը: Հայկական կառույցները Հայոց ցեղասպանության ժխտումը պատժող օրենքի շուրջ երկխոսության մեջ են իշխանությունների հետ: Երկխոսությունը այդ սահմանափակումից դուրս պետք է բերել և կենսական հարցերը, ինչպիսին են Հայաստանի և հայության անվտանգության խնդիրները, պետք է ընդգրկել երկխոսության թեմաների մեջ: Մինչ այսօր Քեսաբի հարցով Ֆրանսիայի կառավարությունը հայկական կառույցների ուղարկած դիմումներն անպատասխան է թողել:

-Անդրադառնալով Հայոց ցեղասպանության հարցին' 100-րդ տարելիցի առիթով Ֆրանսիայում ի՞նչ ծրագրեր կան:

-Ֆրանսիայում գիտաժողովների, թատերական և մշակութային նախաձեռնությունների և հիշատակումների երկար ցանկ է ստեղծվել: Կարևոր հանգրվան է Փարիզի մոտակա Սևր (այս քաղաքի անունը կարևոր նշանակություն ունի հայերի համար) քաղաքում Հայոց ցեղասպանությանը նվիրված հուշահամալիրի կառուցումը: Համալիրի շինության համար մրցանակ շնորհվեց երկու ֆրանսիացի ուսանողների, ովքեր այժմ աշխատում են ճարտարապետական գրասենյակի հետ ծրագրի իրագործման համար: 2015 թվականի ապրիլի 24-ին հուշահամալիրի պաշտոնական բացմանը ներկա կլինեն ֆրանսիական իշխանությունների և միջազգային կառույցների բարձր ներկայացուցիչներ: Հետագայում համալիրում պետք է գործի Հայոց ցեղասպանության ուսումնասիրության և հայկական մշակութային ժառանգության եվրոպական կենտրոնը: