Ֆրանսիան չի մոռանում Միսաք Մանուշյանի զոհողությունը. Ֆրանսուա Օլանդ (լուսանկարներ)

Ֆրանսիայում ազատության կապույտ երկինք փնտրող և իր կյանքն այդ երկրի ազատության համար զոհած Միսաք Մանուշյանի պատվին անվանվեց Երևանի Արամի, Փավստոս Բուզանդի, Եզնիկ Կողբացու փողոցների և Մաշտոցի պողոտայի միջանկյալ հատվածում գտնվող պուրակը: Հանդիսավոր արարողությանը մասնակցող Հայաստանի և Ֆրանսիայի նախագահներ Սերժ Սարգսյանը և Ֆրանսուա Օլանդը ողջունեցին պուրակում հավաքվածներին, ովքեր եկել էին հայ-ֆրանսիական բար եկամության մասին վկայող գրությամբ պաստառներով: «Շնորհակալ եմ բոլորիդ, որ այս անձրևոտ օրը այստեղ եք Ֆրանսիայի ազգային հերոս, բանաստեղծ, դիմադրության շարժման ակտիվ մասնակից Միսաք Մանուշյանի հիշատակը հարգելու համար»,- ասաց Սերժ Սարգսյանը:

Ֆրանսիայի նախագահ Ֆրանսուա Օլանդը, դիմելով ներկաներին, ասաց. «Մեր բարեկամությունն այնքան մեծ է, որ մեր աղոթքները տեղ հասան ու կրկին արևը վերադարձավ»: Ֆրանսուա Օլանդի խոսքով' Միսաք Մանուշյանը, մազապուրծ լինելով սարսափելի ջարդերից, Ֆրանսիայում ազատության կապույտ երկինքը գտնելու գնաց: «Բայց մի քանի տարի հետո բարբարոսությունը վերադարձավ նույնիսկ Ֆրանսիա, նա զենք վերցրեց իրեն օթևան տված երկրի ազատության համար: Մանուշյանը Ֆրանսիայում օտարերկրացի էր, բայց ազատագրեց Ֆրանսիան: Մենք չենք մոռանում նրա զոհողությունը»,- ասաց նախագահ Օլանդը:

Ֆրանսիայի ազգային հերոս Միսաք Մանուշյանի պատվին անվանակոչված պուրակում նախագահները բացեցին պուրակի անվանակոչության հուշատախտակը:

Միսաք Մանուշյանին նվիրված' Լուի Արագոնի բանաստեղծության հիման վրա Ռոբերտ Ամիրխանյանի հեղինակած երգը կատարեց Հայաստանի կամերային երգչախումբը: Այդ ընթացքում նախագահները շրջեցին պուրակում, բարևեցին հավաքված ժողովրդին:

Կոմպոզիտոր Ռոբերտ Ամիրխանյանը նշեց, որ Միսաք Մանուշյանի հանդեպ պետք է ցուցաբերեինք մեր վերաբերմունքը, ով խոշորագույն հետք է թողել համաշխարհային պատմության մեջ: «Միսաք Մանուշյանի հերոսապատումին է անդրադարձել Լուի Արագոնը, և ես որոշեցի այն երաժշտության վերածել: Ես հետո իմացա, որ Լեո Ֆերեն ևս երաժշտություն ունի հեղինակած այդ բանաստեղծության հիման վրա: Գիտեմ, որ համացանցում էլ տեղադրված է, բայց վախեցա լսեմ, որ նա իմ վրա ազդեցություն չթողնի, քանի որ իմ բոլոր կրքերն ինքնուրույն կրքեր են, որևէ մեկից վարակ չունեն»,- ասաց Ռոբերտ Ամիրխանյանը:

Ֆրանսահայ պրոդյուսեր և դերասան Ալեն Թերզյանի հավաստամամբ էլ Միսաք Մանուշյանը Ֆրանսիայում խորհրդանիշ է, ում հիշում են ու գնահատում են: «Մեկ ամիս առաջ նախագահ Օլանդը Ֆրանսիայում հիշատակեց, թե երկրի համար Միսաք Մանուշյանն ինչ կարևորություն ունի և նշեց, որ պետք է հիշել հայերին»,- ասաց Ալեն Թերզյան:

Միսաք Մանուշյանը ծնվել է 1906 թ. Արևմտյան Հայաստանի Ադիյաման գյուղում։ Հայրը զոհվել է 1915 թ. Մեծ Եղեռնի ժամանակ, մայրը՝ գաղթի ճանապարհին: Միսաքը եղբոր հետ հայտնվել է Սիրիայում. 1920 թվականից Լիբանանի Ճյոնիա քաղաքի հայկական որբանոցի սաներ են եղել: 1925 թ. տեղափոխվել են Ֆրանսիա, սկզբում Մարսել ապա՝ Փարիզ։ 1930 թվականից Ա. Սեմայի հետ հրատարակել է «Ջանք» գրական ամսագիրը: Աշխատել է Սիթրոեն գործարանում, 1937 թվականից՝ թողարկել «Զանգու» շաբաթաթերթը, գրել բանաստեղծություններ: 1935 թվականից ՀՕԿ, իսկ 1937-ից կենտրոնական վարչության անդամ։ Կնոջ՝ Մելինե Մանուշյանի հետ մասնակցել է հակաֆաշիստական դիմադրության շարժմանը։ 1943թ. Մանուշյանի գլխավորած խումբը մոտ 30 հարձակում է գործել գերմանական օկուպանտների վրա: 1943 թ. նոյեմբերին, Մանուշյանը ձերբակալվել և տանջանքների է ենթարկվել և երեք ամիս անց, 1944 թվականի փետրվար 21-ին, իր խմբի 21 անդամների հետ միասին մահապատժի է ենթարկվել Փարիզի Սյուրեն արվարձանի Ֆորտ Մոն-Վալերյեն ամրոցում: Մանուշյանին հետմահու շնորհվել է Պատվո լեգեոնի շքանշանը։

Փարիզում Միսաք Մանուշյանի անվամբ փողոց կա: