«Ժողովուրդ». ԲՀԿ համագումարին փաստացի լուծվելու է կուսակցության լինել-չլինելու հարցը

Վաղը կայանալիք ԲՀԿ դռնփակ համագումարում փաստացի լուծվելու է ոչ թե այդ կուսակցության նոր նախագահի կամ հետագա քաղաքական գծի, այլ ուղղակի լինել-չլինելու հարցը:

«Ժողովուրդ»-ի տեղեկություններով՝ այս օրերին ԲՀԿ ակտիվի ներսում ընթացող խմորումների հանրագումարն այն է, որ կուսակցությունը կկարողանա իր մինիմալ գոյությունը պահպանել միայն մեկ դեպքում՝ եթե ԲՀԿ առաջնորդ Գագիկ Ծառուկյանը վստահեցնի, որ կապ չունի' ինքը պաշտոնապես կլինի ԲՀԿ նախագահը, թե ոչ, ամեն դեպքում շարունակելու է ղեկավարել կուսակցությունը: Եթե նման հայտարարություն հնչի, ապա ԲՀԿ-ականների մի մասը միգուցե կհամաձայնի նոր նախագահի պայմաններում մնալ կուսակցությունում: Այդ դեպքում նոր նախագահը փաստացի կդառնա Գագիկ Ծառուկյանի կամքը հաղորդողը: Իսկ եթե Ծառուկյանը հայտարարի իսպառ քաղաքականությունից դուրս գալու մասին, ապա կարճ ժամանակում ԲՀԿ-ն կկազմալուծվի:

Բանն այն է, որ չնայած արդեն որոշվել է, որ ԲՀԿ-ի նոր նախագահը պետք է Նաիրա Զոհրաբյանը լինի, բայց կուսակցության ակտիվի շրջանում խմորումները ոչ միայն չեն դադարում, այլև ավելի են խորանում: Այդ ամենի արդյունքում ակնհայտ է մեկ բան' ԲՀԿ-ն կառուցվել է մեկ անձի' Գագիկ Ծառուկյանի շուրջ, և եթե նա դուրս գա, ապա այդ կառույցը փլվելու է:

Մյուս կողմից հայտնի է, որ Գագիկ Ծառուկյանը Սերժ Սարգսյանին խոստացել է քաղաքականությունից ամբողջությամբ դուրս գալ, ուստի թեկուզ ստվերային կարգով ԲՀԿ ղեկին մնալը կնշանակի պայմանավորվածության խախտում՝ այստեղից բխող բոլոր հետևանքներով:

Շարունակությունը՝ թերթի այսօրվա համարում։