ՀՀ գյուղատնտեսության նախարարն ընդունել է Հայաստանում Լիբանանի դեսպան Ժան Մաքարոնին

ՀՀ գյուղատնտեսության նախարար Սերգո Կարապետյանն այսօր ընդունել է Հայաստանում Լիբանանի Հանրապետության արտակարգ և լիազոր դեսպան Ժան Մաքարոնին:

Ողջունելով հյուրին' նախարարը գոհունակություն է հայտնել գյուղատնտեսության ոլորտում երկկողմ համագործակցության ներկա մակարդակով:

«Մենք շատ բարձր ենք գնահատում Ձեր ջանքերը հայ-լիբանանյան բարեկամական կապերի ամրապնդման գործում , քանի որ Լիբանանը մեզ համար շատ կարևոր գործընկեր է, որն ունի նաև մեծ հայկական համայնք», - նշել է նախարարը:

Դեսպան Ժան Մաքարոնն իր հերթին նախարարին է հղել Լիբանանի գյուղատնտեսության նախարար Աքրամ Շահիբի ողջույնն ու առաջիկայում Լիբանան այցելելու հրավերը' երկրի գյուղատնտեսական նորամուծություններին ծանոթանալու համար:

Նա նաև տեղեկացրել է, որ լիբանյան ընկերություններից մեկը ցանկություն է հայտնել բարեգործական նպատակներով Աշտարակ քաղաքին նվիրաբերել շուրջ 20 հազար եղևնու տնկիներ, որոնց համար արդեն հատկացված է հողատարածք:

Նշելով, որ առաջիկայում նախատեսվում է Լիբանանի գյուղատնտեսության նախարարի գլխավորած պատվիրակության այցը Հայաստան, որի կազմում կլինեն շուրջ 50 լիբանանցի գործարարներ' դեսպանը համոզմունք է հայտնել, որ այցը հրաշալի առիթ կարող է հանդիսանալ գյուղատնտեսության բնագավառում հայ-լիբանանյան նոր գործարար կապերի հաստատման և դեպի Հայաստան լիբանանյան կապիտալի ներհոսքի համար:

Նախարարը նույնպես ընդգծել է նմանատիպ այցերի կարևորությունն ագրարային ոլորտում երկկողմ հարաբերությունների խթանման համար և շեշտել, որ որպես ներդրման հնարավոր ուղղություն առաջնահերթ դիտարկում է անասնապահության ոլորտը (մասնավորապես ոչխարաբուծությունն ու թռչնաբուծությունը):

Հանդիպման ավարտին նախարարը ևս մեկ անգամ պատրաստակամություն է հայտնել աջակցություն ցուցաբերել հայ-լիբանանյան փոխգործակցության խորացման և ընդլայնման հարցում: