Ի՞նչ նվիրել կանանց Մարտի 8-ի առթիվ

Սոցիոլոգ Ահարոն Ադիբեկյանը Կանանց տոնի հետ կապված մեծ ծախսեր չի անելու: Տանը իգական սեռի չորս ներկայացուցիչ ունեցող Ադիբեկյանը որոշել է' տանը համեստ սեղան կպատրաստի, պահած շամպայնը կբացի ու կնշի Մարտի 8-ը: Ճոխ նվերների փոխարեն սոցիոլոգը առավոտյան կնոջ ու աղջիկների համար սուրճ կպատրաստի, դեմ չէ նաև երեկոյան ընթրիքից հետո լվանալ ափսեները:

«Արմենպրես»-ի փոխանցմամբ, Ադիբեկյանը շեշտում է' կարևորը ոչ թե գինն է, այլ վերաբերմունքը: «Ֆինանսական պայմաններն այսօր այնպիսին են, որ հնարավոր չէ գնել այն, ինչ ցանկանում ես: Այս դեպքում կանայք պետք է շատ բան չպահանջեն տղամարդկանցից, տղամարդիկ էլ, դժվար պայմանների պարագայում անգամ պետք է չմոռանան շնորհավորել կանանց: Ծաղիկ, շամպայն, շոկոլադ, թե պարզապես շնորհավորանք' այդքան էլ էական չէ»,- ասում է Ադիբեկյանը:

Եթե աշխարհում ապրանքի պահանջարկի պարագայում գինն իջնում է, Հայաստանում հակառակն է: «Սպառողների ասոցիացիայի» նախագահ Արմեն Պողոսյանի գնահատմամբ' կանանց միամսյակի կապակցությամբ երկրում ծաղիկները ու հուշանվերները թանկացել են: Պողոսյանն առավոտյան այցելել է բնակարանի հարևանությամբ գործող ծաղկի խանութն ու պարզել, որ ծաղիկները երեք անգամ թանկացել են, հետևաբար' միամսյակը կանայք կարող են սկսել նաև առանց ծաղկի:

Հոգեբան Աննա Բադալյանը ներքին հակադրություն ունի «կանանց միամսյակ» արտահայտության հետ կապված: Նրա խոսքով' յուրաքանչյուր կին յուրաքանչյուր օր պետք է արժանանա գովեստի, գեղեցիկ խոսքերի և ուշադրության: «Կանանց վերաբերմունքը նման է բումերանգի: Եթե դու նրան մի փոքր ուշադրություն և սեր նվիրես' եռակին կստանաս»,- ասում է հոգեբանը' հավելելով, որ, անկախ այն հանգամանքից, որ դարեր շարունակ կանայք գնահատել են հոգևոր վերաբերմունքը, սակայն դեմ չեն նաև գեղեցիկ նվերների:

Տղամարդկանց ուշադրությունից զատ, հոգեբանը խորհուրդ է տալիս կանանց ավելի սիրելի սեփական անձն ու բարձրացնել ինքնագնահատականը: «Լինել վստահ, խնամված, նորաձև: Սա գեղեցիկ և երիտասարդ մնալու լավագույն գրավականն է: Քնքշություն, պարզություն և բարություն: Սրանք պետք է լինեն կնոջ ուղեկիցներ»,- ասում է հոգեբանը' հավելելով, որ կանայք պետք է հեռանան էթնիկ մտածելակերպից, և, երեխաներին ու ընտանիքին զուգահեռ, մեծ ուշադրություն դարձնեն նաև իրենց առողջությանն ու արտաքին տեսքին: