Լիլիթ Մկրտչյանի կարծիքով` կանանց դերը մեծանում է թե' սպորտում, թե' այլ ասպարեզներում

Շախմատի Հայաստանի հավաքականի անդամ Լիլիթ Մկրտչյանի կարծիքով՝ կինը միշտ էլ շատ կարևոր դեր է խաղացել մեր իրականության մեջ և ժամանակի հետ մեկտեղ կանանց դերը մեծանում է նաև տարբեր բնագավառներում: «Մենք' կանայք, մեծ դեր ունենք, անշուշտ, նախ որ սերնդի շարունակողը մենք ենք: Սակայն, գնալով տարբեր բնագավառներում՝ թե՛ սպորտում և թե՛ մեր իրականության այլ ոլորտներում, կանանց դեր քիչ-քիչ ավելի է մեծանում»,- «Արմենպրես»-ի հետ զրույցում փաստեց Մկրտչյանը:

Վերջինիս խոսքով՝ շախմատում կանայք ավելի մրցունակ են դառնում ի համեմատ տղամարդկանց: «Կին շախմատիստներն արդեն ավելի մեծ արդյունքների են հասնում, ինչպես օրինակ նրանք, ովքեր կարողանում են հաղթահարել տղամարդ գրոսմայստերների նորմաները»,- ասաց նա:

Հավաքականի անդամը, շնորհավորելով Կանանց միջազգային տոնի առթիվ, մաղթեց հետևյալը. «Պետք է փորձենք միշտ լինել կենսուրախ, ժպտերես, գեղեցիկ և վայելենք բոլոր ուրախ պահերը»:

Լիլիթ Մկրտչյանը 2003 թվականին Հայաստանի ազգային հավաքականի կազմում հաղթել է Բուլղարիայում կայացած Եվրոպայի թիմային առաջնությունում։ 2002 թվականին Վառնայում և 2009 թվականին Սանկտ Պետերբուրգում կայացած Եվրոպայի անհատական առաջնությունների արծաթե մեդալակիր է: Հայաստանի քառակի չեմպիոն է։