«Եվրատեսիլում» Ադրբեջանը կներկայացնի Թուրքիայում շանը հավասարեցված ադրբեջանցին

Այս տարի անցկացվելիք «Եվրատեսիլ-2015»- երգի միջազգային մրցույթում Ադրբեջանը կներկայացնի Թուրքիայում «Թուրքիայի ձայն» հեռուստամրցույթում հաղթանակ տարած ադրբեջանցի Էլնուր Հուսեյնովը, ով այդ երկրում հավասարեցվել է շանը:

Ինչպես հաղորդում է «Արմենպրես»-ը, Ադրբեջանը «Եվրատեսիլ-2015»-ում թուրքական մրցույթում հաղթանակած ադրբեջանցու կողմից ներկայացվելու մասին հայտնում է moderator.az լրատվական կայքը' հղում կատարելով սեփական հավաստի աղբյուրներին:

Թուրքական «Ռադիկալ» թերթի սյունակագիր Բյուլենթ Էրիշը «Թուրքիայի ձայն» մրցույթի ադրբեջանցի հաղթող Ադրբեջանի քաղաքացի Էլնուր Հուսեյնովին հավասարեցրել էր ավելի վաղ անցկացված' «Շնորհալին դու ես» մրցույթում հաղթած Մաքս անունով շանը:

«Նախկինում Մաքս շունը, այսօր' Էլնուրը» վերնագրով հոդվածում թուրք լրագրողը, ադրբեջանցու հաղթանակի հետ կապված, գրել էր. «Թուրքիայի երաժշտության համար սրանից ավելի ամոթալի օր չէր եղել»:

«Նախկին մրցույթում Թուրքիայի ամենաշնորհալին շուն էր, իսկ այսօր Թուրքիայի «ձայնը» դարձավ ադրբեջանցին», -նշել է նա:

Թուրք հոդվածագիրը ընթերցողներից խնդրել էր իր արտահայտությունները ռասիստական չհամարել այն պարզ պատճառով, որ ինքը գտնում է, որ Թուրքիայի ձայնը պետք է ընտրվեր թուրքաբնակ քաղաքացիների միջից, ինչը հանդիսանում է մրցույթի իմաստը:

Ինչ մնում է ադրբեջանցուն Մաքս շան հետ համեմատելուն, Էրիշը դա բացատրել էր այն բանով, որ չնայած թուրք շնորհալիների մրցույթին մասնակցել են երաժիշտներ, երգիչներ, ձեռնածուներ, ակրոբատներ, մարզիկներ, նկարիչներ և շատ ուրիշներ, սակայն, նրանցից ոչ մեկը Մաքսից շնորհալի չի եղել, և հաղթել է այդ շունը:

«Ժողովուրդը որոշեց, որ այդքան մասնակիցների մեջ ամենաշնորհալին հենց Մաքսն է: Փաստորեն, ժողովուրդը շանն ավելի շնորհաշատ համարեց բոլոր մասնակից արվեստագետներից: Իսկ այս մրցույթում 200 թուրքիացիների մեջ ադրբեջանցի Էլնուրն էր առաջինը: Այդ դեպքում, ի՞նչ իմաստ ունի այդ մրցույթն անվանել «Թուրքիայի ձայն»: Գուցե և նրա ձայնը լավն է, բայց դա հիմք չէ, որ նա նախ մասնակցեր այդ մրցույթին և, ավելին, հաղթանակ տաներ: Ես դա չեմ հասկանում: Թուրքիայի երաժշտության համար սրանից ամոթալի օր չէր եղել»,- նշել է նա:

Թուրք լրագրողը նաև կասկած էր հայտնել, որ Ադրբեջանի քաղաքացու օգտին իսկապես քվեարկել են թուրքերը: Նա ասել էր, որ երբ այդ մրցույթում ավելի վաղ հաղթել էր ծագումով ադրբեջանցի մեծահարուստի կին Էբրու Գյունդեշը, հետո հայտնի էր դարձել, որ միլիոնավոր դոլարների SMS հաղորդագրություններն ուղարկվել են մեկ հեռախոսահամարից:

Թուրքիայում ավելի վաղ անցկացված «Շնորհալին դու ես» մրցույթում հաղթող էր ճանաչվել Մաքս անունուվ շունը: