Սեյրան Օհանյանը «Հայկյան» մրցանակ է ստացել

Հայաստանի երիտասարդական հիմնադրամը ՀՀ պաշտպանության նախարար Սեյրան Օհանյանին է շնորհել «Հայկյան-2014» մրցանակ: «Երիտասարդական ոլորտին առավելագույնս աջակցած պետական գործիչ» անվանակարգում մրցանակը նախարարին է հանձնել ՀԵՀ հոգաբարձուների խորհրդի համակարգող Կարեն Ավագյանը:

«Սովորաբար, Դուք եք պարգևներ հանձնում: Թույլ տվեք խախտել ավանդույթը և այս անգամ Ձեզ հանձնել: Այս մրցանակի շնորհումը իրականում ոչ թե ինչ-որ անձի, կամ որևէ հանձնաժողովի որոշում էր, այլ հենց երիտասարդների' Սեյրան Օհանյան գործչի նկատմամբ ունեցած գնահատանքի և շնորհակալության դրսևորում»,- նշել է նա:

Սեյրան Օհանյանը նշել է, որ «Հայկյան» մրցանակ ստանալն իր համար մեծ պատիվ է ու պատասխանատվություն՝ ավելի ուշադիր և հոգատար լինել երիտասարդների նկատմամբ, հարգել նրանց անձնական արժանապատվությունը:

Խոսելով երիտասարդական ոլորտում կատարված աշխատանքների և դրանց արդյունքների մասին՝ նախարարն ասել է. «Իմ համագործակցությունը երիտասարդական բոլոր կազմակերպությունների հետ կազմակերպում եմ որպես ամենամեծ երիտասարդական կազմակերպության ղեկավար: Մեր, ինչպես նաև հիմնադրամի նպատակը մեկն է՝ երիտասարդներին ավելի պատրաստված տեսնել' որպես եռանդուն, ավյունով լի աշխատունակ և օրինապաշտ քաղաքացիների»:

Սեյրան Օհանյանի կարծիքով՝ բանակում կատարված բարեփոխումների արդյունքներն արդեն տեսանելի են. «2008-ից սկսած բարեփոխումների հիմնական ուղղությունը բանակ-հասարակություն կապի ամրապնդումն է եղել: Նրանում մեծ տեղ է տրվել երիտասարդների ռազմահայրենասիրական դաստիարակությանը: Համագործակցում ենք և՛ դպրոցների, և՛ այլ կրթական հաստատությունների, հասարակության տարբեր կազմակերպությունների հետ»: Հիմնադրամի հետ համագործակցությունը նախարարն արդյունավետ համարեց ու նշեց. «Ավանդական ծրագրերին զուգահեռ յուրաքանչյուր տարի ինչ-ո ր մի նորություն մտցնում ենք բանակի բարեփոխումների շրջանակներում և խնդրում ենք հիմնադրամին այն ոլորտներին ուշադրություն դարձնել, որոնք գտնում են անհրաժեշտ»:

Օհանյանը նշել է, թե գրեթե յուրքանչյուր ընտանիք իր դեսպանն ունի զինված ուժերում, ուստի ՀՀ զինված ուժերն աշխատում են թափանցիկ' ավելի հզորացած, զարգացած ու կարգապահ դառնալու նպատակով: