Թոմաս Էդիսոնը փորձել է հեռախոս ստեղծել մեռյալների հետ հաղորդակցվելու համար

Թոմաս Էդիսոնը փորձել է սարք ստեղծել հանգուցյալների հետ խոսելու համար: Այս մասին է վկայում գյուտարարի հուշագրությունների ֆրանսերեն թարգմանության քիչ հայտնի գլուխը, որը հրապարակվել է մարտի 5-ին, հաղորդում է «Արմենպրես»-ը՝ հղում անելով Agence France-Presse-ին:

Ամերիկացի ինքնուս գյուտարարը, որն առավել հայտնի է իր ձայնագրանցիչի և շիկացման լամպի նոր կառուցվածքի շնորհիվ, նաև ցանկացել է ստեղծել «հոգեխոս» մեռյալների հետ հաղորդակցման համար: Նման սարք ստեղծելու փորձերի մասին Էդիսոնը պատմել է իր նոթերի (Diary and Sundry Observations) վերջին գլխում, որոնք հրապարակվել են հետմահու (1948 թվականին):

Սակայն նոթերի անգլալեզու հրատարակություններում Էդիսոնի անդրաշխարհային գիտափորձերի մասին եզրափակիչ գլուխը հանված է: Այն պահպանվել է 1949 թվականի ֆրանսիական հրատարակությունում և այնտեղից փոխադրվել է գյուտարարի մասին պատմող նոր գիրք, որը 2015 թվականի մարտի սկզբին ներկայացվել է Ֆրանսիայում:

Պարզվում է՝ 1870 թվականի վերջին Էդիսոնը փորձել է հորինել «հոգեխոս», որն ուժեղացնում է նրա հնչյունագրիչների (գրամոֆոնների նախատիպերի) ձայնային ազդանշանները: Դեռ ավելին, նա իր գործընկերոջ (ինժեներ Ուիլյամ Ուոլտեր Դինուիդիի) հետ պայմանագիր է կնքել այն մասին, որ իրենցից առաջինը մեռնողը կփորձի երկրորդին ուղերձ հղել այն աշխարհից: Էդիսոնը համոզված էր ոչ միայն ուրվականների գոյության, այլև նրանց զրուցասիրության հարցում և հույս ուներ լսելի դարձնել մեռյալների ձայնը, նշել է նոթերի հրատարակիչ Ֆիլիպ Բոդուենը: