Հայաստանյան «Քարֆուրի» առանձնահատկությունները

Մի քանի տարի ձգված բանակցություններից և նախապատրաստական աշխատանքներից հետո Երևանում բացվեց «Քարֆուր» ֆրանսիական մանրածախ առևտրային ցանցի առաջին հիպերմարկետը: Աշխարհում իր մեծությամբ երկրորդ առևտրային ցանցի մուտքը Հայաստան ինքնին մեծ իրադարձություն է, քանի որ վերջինը խոստանում է ոչ միայն նոր ապրանքներ մատակարարել մեր շուկա, այլև հայկական արտադրանքը ներկայացնել իր ցանցի մյուս հիպերմարկետներում: Թե տեղական արտադրողների համար որքան իրատեսական կլինի ֆրասիական ընկերության այս առաջարկը, ցույց կտա ժամանակը, իսկ ներկայումս կարելի է միայն փաստել, որ «Քարֆուրի» ֆրանսիական ապրանքների կողքին Հայաստանի դրոշներով և «Հայկական» մակնշմամբ առանձնացված են տեղական արտադրության ապրանքները:

Հայաստանի քաղաքացիներին «Քարֆուրի» հաջորդ խոստումն այն էր, որ հիպերմարկետում լինելու են «ցածր գներ ամեն օր»:

Առևտրային կենտրոնում շրջայցի ընթացքում մենք չնկատեցինք գնային մեծ տարբերություններ հայաստանյան այլ առևտրային ցանցերի հետ համեմատած, չնայած դրան՝ մի շարք ապրանքների համար սահմանված էին ակցիաներ և հատուկ գներ:

«Արմենպրես»-ի հաղորդմամբ' հիպերմարկետի գլխավոր մուտքի մոտ կանգնեցված առևտրային սայլակում առանձնացված էին այն ապրանքները, որոնց համար գործում էին զեղչեր: «Համեմատական սայլակը» պարունակում էր 26 հազար 770 դրամ արժողությամբ ապրանքներ, որոնք միասին վերցրած 4 տոկոսով էժան էին հայաստանյան այլ առևտրային կենտրոնների նույն արտադրանքների արժեքից:

Հայաստանյան «Քարֆուրում» աշխատակիցների հիմնական մասը հայեր էին: «Քարֆուր» առևտրային ցանցի հայաստանյան գրասենյակի տնօրեն Քրիստիան դը Նալը լրագրողների հետ զրույցում նշեց, որ դա իրենց քաղաքականությունն է' աշխատանքով ապահովել տվյալ տարածաշրջանի բնակիչներին: Հաջորդ առանձնահատկությունը, որ նշեց ֆրանսիացի գործարարը, այն էր, որ հիպերմարկետում ստեղծված են հնարավոր բոլոր պայմանները, որպեսզի մարդիկ կարողնան արագ գնումներ կատարել և շատ ժամանակ չծախսել:

Հիպերմարկետում ներկայացված են նաև ֆրանսիական արտադրության այնպիսի ապրանքներ, որոնք չեն վաճառվում հայաստանյան այլ սուպերմարկետներում: «Քարֆուրը» պահպանել է նաև օրենքի այն դրույթը, որով գնված ապրանքը կարելի է հետ վերադարձնել կամ փոխանակել 14-օրյա ժամկետում:

Հաջորդ անակնկալը, որին ականատես եղանք հիպերմարկետում, այն էր, որ արգելվում էր ցանկացած տեսակի տեսանկարահանումը: Լրագրողներին թույլ չտվեցին շրջել և նկարահանել հիպերմարկետի տարածքը, իսկ տնօրինության հետ բանակցությունների արդյունքում հնարավոր եղավ հասնել նրան, որ նկարահանում իրականացվեր միայն հիպերմարկետի մուտքի հատվածում: