Ադրբեջանցին սարսափում է Պատանի երկրապահից

Ձեզ ենք ներկայացնում Լուրեր.com-ի հարցազրույցը ԵԿՄ վարչության փոխնախագահ Խաչիկ Մկրտչյանի հետ.

-Պարո՛ն Մկրտչյան, ի՞նչ արդյունք են տալիս ԵԿՄ «Պատանի երկրապահ» կառույցի հրամանատարասերժանտական դասընթացները։

-«Պատանի երկրապահ» կառույցը ԵԿՄ-ում գործում է 1997 թվականից։ Մեր կառույցով անցած պատանիներն ու աղջիկները ՀՀ լիարժեք քաղաքացի են դառնում, պիտանի մարդիկ հայրենիքի, պետության, ազգի և իրենց ընտանիքների համար, հայ առաքելական ճշմարիտ հավատքի հետևորդ։ Մեր այս կառույցներով անցած տղաները բանակի լավագույն զինվորներ և սպաներ են դառնում։ 2014-ը բացառիկ տարի էր մեր երկրում ռազմահայրենասիրական դաստիարակության հիմքերի ամրացման, խորացման տեսանկյունից։ ԵԿՄ վարչության նախագահ, Արցախի հերոս Մանվել Գրիգորյանի նախաձեռնությամբ և ՀՀ նախագահ, երկրապահ Սերժ Սարգսյանի գործուն աջակցությամբ Հանրապետության բոլոր դպրոցներում «Պատանի երկրապահ» հայրենասիրական ակումբներ հիմնելու վերաբերյալ եռակողմ հուշագիր ստորագրվեց ԵԿՄ-ի, պաշտպանության նախարարության և կրթության և գիտության նախարարության միջև: Այսօր արդեն պատանի երկրապահի հպարտ կոչումը կրում են տասնյակհազարավոր պատանիներ։ Երևի դուք էլ ականատես եք եղել, թե երեխաներն ինչ ոգևորությամբ մարտի 5-ին հանդիսավոր երդում տվեցին։

Հիմա կա անհրաժեշտություն, որ նորագիրները ևս յուրացնեն այն բոլոր հմտությունները, որ ունեն կառույցի հնաբնակ անդամները՝ գիտելիքներ շարային, կրակային պատրաստությունից, մարտարվեստ, հայոց պատմություն, հայ եկեղեցու պատմություն, պետական և երկրապահական խորհրդանիշեր, առաջին բուժօգնություն, արտակարգ իրավիճակներում կողմնորոշում, ճանապարհային երթևեկության անվտանգության կանոններ և այլն։ Ի դեպ, դասընթացների ժամանակ մեզ օգնում են բոլոր գործընկեր կառույցների ներկայացուցիչները, որոնց հետ ևս առանձին հուշագրեր ենք ստորագրել։

Խոսքս վերաբերում է պաշտպանության, կրթության, տարածքային կառավարման և արտակարգ իրավիճակների, սոցիալական հարցերի, առողջապահության նախարարություններին, տարածքային կառավարման, տեղական ինքնակառավարման մարմիններին և անշուշտ՝ հայ առաքելական սուրբ եկեղեցուն։ Մենք Հանրապետության բոլոր մարզերում, բոլոր տարածքներում արդեն նորագիր սաների հետ քառամսյա դասընթացներ ենք անցկացրել և ընդունել քննություններ։ Հիմա արդեն մեկնարկել են 2-րդ հոսքի ուսուցման դասընթացները։

-Խոսեցիք մարտի 5-ի միջոցառումների մասին։ Արդյունքներն ամփոփվե՞լ են։ Թերևս նման լայնամասշտաբ ծրագիրն իրականացնելու համար ևս տարբեր կառույցների հետ գործակցելու անհրաժեշտություն է եղել։

-Մարտի 5-ը կարևոր օր է ԵԿՄ տոնացույցում։ Դա Երկրապահի և հայոց կանոնավոր բանակի հիմնադիր Սպարապետ Վազգեն Սարգսյանի ծննդյան օրն է։ Այդ օրը երկրապահական պատվիրակությունները ծաղկադրումներ են արել Հայաստանում, Արցախում Սպարապետի պատվին կանգնեցված բոլոր հուշարձանների մոտ։ Ծաղկադրումներ են եղել նաև Սփյուռքում: Մենք օրն սկսել ենք ԵԿՄ վարչության շենքում կանգնեցված կիսանդրու առջև խոնարհումով, այնուհետև եռասերունդ երկրապահական պատվիրակությունը՝ Զորավար Մանվել Գրիգորյանի գլխավորությամբ, այցելել է Արարատ՝ Սպարապետի օջախում՝ իր ծնողների հետ նշելու տարեդարձը։ Մեծ մայր Գրետա մայրիկին շնորհավորելուց հետո Եռաբլուրում ծաղիկներ ենք խոնարհել Սպարապետի շիրմին։ Արդեն յոթերորդ անգամ Պատանի երկրապահի երդման արարողությունը կազմակերպվեց Սպարապետի ծննդյան օրը։ Սակայն, այս տարի՝ հայոց ցեղասպանության 100-ամյա տարելիցի առիթով, երդման արարողությունը Ծիծեռնակաբերդի բարձունքում կազմակերպվեց, ուր մեր պատանիներն, ի հավելումն ավանդական տեքստի, երդվեցին լինել նաև պահանջատեր, ինչպիսին Սպարապետն էր։ Բնական է, որ այս լայնամասշտաբ ծրագրի հարցում էական աջակցություն ենք ստացել տարբեր կառույցներից, և ես, օգտվելով առիթից, խորին շնորհակալություն եմ հայտնում մեզ օժանդակություն ցուցաբերած հաստատություններին։ Նախ և առաջ՝ շնորհակալություն ՀՀ նախագահ Սերժ Սարգսյանին։

Շնորհակալություն պաշտպանության նախարար Սեյրան Օհանյանին և նախարարությանը: Պաշտպանության նախարարությունը ե՛ւ օժանդակեց միջոցառումներին, ե՛ւ փաստացի համակազմակերպչի կարգավիճակում հանդես եկավ՝ մասնակցելով կազմակերպչական բոլոր-բոլոր աշխատանքներին՝ իր ստորաբաժանումներով մասնակցելով նաև շքերթին: Շքերթին առանձին կազմավորմամբ մասնակցեց նաև արտակարգ իրավիճակների նախարարությունը, կառույց, որ միշտ էական աջակցություն է ցուցաբերում պատանիների հետ տարվող մեր աշխատանքներին: Արմեն Երիցյանին և իր ղեկավարած գերատեսչությանը՝ Մուշեղ Ղազարյանին, մյուս մասնագետներին նույնպես խորին շնորհակալություն: Շնորհակալություն կրթության, սոցիալական հարցերի, առողջապահության նախարարություններին, ՀՀ ոստիկանությանը, առանձնապես շեշտեմ՝ ճանապարհային ոստիկանությանը։ Այս մարդիկ վաղ առավոտյան Հանրապետության բոլոր մարզերից Երևան ուղեկցեցին տասնյակհազարավոր եռասերունդ երկրապահներին, միջոցառումների ավարտից հետո էլ անվտանգ տարան և իրենց ծնողներին հասցրին երեխաներին: Մենք, անձամբ ԵԿՄ ղեկավարը, լարված մնացել ենք մինչև այն պահը, երբ զեկուցվել է, որ ամենահեռավոր շրջաններից ժամանած վերջին պատվիրակություններն ապահով տեղ են հասել, արդեն իրենց տներում են: Այս մասով էական աջակցություն ստացանք նաև պաշտպանության նախարարության ռազմական ոստիկանությունից:

Շնորհակալություններ մարզպետներին, մեր ձեռնարկին աջակցած համայնքապետերին։ Շնորհակալություն միջոցառմանը մասնակցած ԱԺ նախագահին և պառլամենտական պատվիրակությանը։ Շնորհակալություն կառավարությանը: Ձեզ էլ եմ ցանկանում շնորհակալություն հայտնել։ Մամուլը ակտիվորեն և օբյեկտիվ լուսաբանեց միջոցառումը, ինչը նույնպես անչափ կարևոր է։ Ձեր շնորհիվ Բաքվում էլ տեսան, թե ինչ հզոր և հայրենասեր սերունդ է մեծանում Հայաստանում։ Մի կասկածեք՝ թուրք ազերին սարսափում է՝ տեսնելով, որ Հայաստանում նույնիսկ 4-5 տարեկան աղջիկներն են պատրաստ հանուն հայրենիքի շարք կանգնել, կատարել ցանկացած հայրենասիրական հանձնարարություն։

-Ի դեպ, այս տեսանկյունից նաև որոշակի քննադատություն է հնչում ԵԿՄ-ի հասցեին, որ 21-րդ դարում մարդկանց հարկավոր է ոչ թե զենքի, այլ գրիչի, համակարգչի սովորեցնել:

-Միշտ և բոլոր երկրերում էլ գտնվում են պարապ մարդիկ, ովքեր ոչնչի ընդունակ չեն և փորձում են սևացնել ազգի նվիրյալների կատարած հայրենասիրական լուրջ աշխատանքը: Զորավարը բազմիցս է ասել, կրկնել: Մենք ապրում ենք այսպիսի տարածաշրջանում՝ թշնամիներով շրջապատված և պարտավոր ենք ինքնապաշտպանության պատրաստ լինել, պարտավոր ենք զենքին, ռազմարվեստին լավ տիրապետել: Երբ թուրքը զենքով մեզ վրա է գալիս, գրիչով պաշտպանվել չենք կարող: Ի դեպ, ԵԿՄ վարչության նախագահն ինքն էլ մշտապես կրկնում է, որ այսօր պետք է կարողանանք աշխարհին համընթաց քայլել նաև գիտության, մշակույթի, սպորտի ասպարեզներում: Այդ պատճառով է, որ մեր պատանիներին շարունակ հորդորում ենք դպրոցներում էլ օրինակելի վարք և գերազանց առաջադիմություն ունենալ: Մեր պատանիներին նաև գրիչի և համակարգչի ենք սովորեցնում:

Այո՛, կարևոր է գրագետ լինելը, լավ չէ, օրինակ, երբ մարդ տառասխալ է թույլ տալիս: Բայց առավել կարևոր է ճիշտ ապրելը, կյանքում ճակատագրական սխալներ թույլ չտալը, հատկապես՝ պետության, ժողովրդի հանդեպ: Երկրապահ կամավորականների միությունը մարդկանց նաև ճիշտ ապրել է սովորեցնում, սրբությունները՝ Աստծուն, հայրենիքը, ծնողներին հարգել և պաշտպանել է սովորեցնում: Մեր պատանիներն ու աղջիկները դաստիարակվում են հարուստ կենսափորձ ունեցող Արցախի հերոս Մանվել Գրիգորյանի խորհրդով. «Վերևում Աստված է, ներքևում՝ մայրը, առջևում՝ հայոց անկախ պետականությունը»: