Մարդկությանը միայնության համաճարակ է սպառնում. հետազոտություն

Միայնությունը և սոցիալական մեկուսացումն ավելի մեծ սպառնալիք են մարդու առողջության և կյանքի համար, քան ճարպակալումը: Ինչպես տեղեկացնում է «Արմենպրես»-ը, այս եզրակացության են եկել Brigham Young University-ի մի խումբ հետազոտողներ, որոնք իրենց ուսումնասիրության արդյունքները հրապարակել են Perspectives on Psychological Science-ում:

Գիտնականները վերլուծել են տարբեր տարիքի գրեթե երեք միլիոն մարդու բժշկական տվյալներ և պարզել, որ սոցիալական կապերի բացակայությունը լրացուցիչ մեծ վտանգ է կյանքի համար: Նրանք եկել են նաև այն եզրակացության, որ միայնության և մահացության վտանգի միջև կապը երիտասարդների շրջանում ավելի մեծ է, քան տարեցների շրջանում:

«Այսօր ավելի ու ավելի շատ մարդիկ են հայտնվում միայնության ճիրաններում, և մենք դրա հնարավոր համաճարակ ենք կանխագուշակում ապագայում»,- ասել է հետազոտության հեղինակներից մեկը՝ Թիմ Սմիթը:

Միայնությունն ու սոցիալական մեկուսացումը կարող են միանգամայն այլ տեսք ունենալ, քան դրանք սովորաբար պատկերացնում են: Օրինակ, մեկը կարող է շրջապատված լինել բազմաթիվ մարդկանցով, բայց էլի իրեն միայնակ զգալ:

Սմիթը նշում է, որ հետազոտության արդյունքները խոսում են այն մասին, որ դրական միջանձնային շփումը, մարդկանց միջև վստահության մթնոլորտը և հուզական կապը ազդում են ոչ միայն մարդու հոգեկան, այլ նաև ֆիզիկական վիճակի վրա, հաղորդել է ՌԻԱ Նովոստին: