Կարողացե՞լ են այնպես անել, որ ԲՀԿ-ն կողմնորոշվի ի օգուտ ՀՀԿ-ի

ՀՀԿ գրասենյակում մեկնարկել է կուսակցության գործադիր մարմնի նիստը, որը վարում է Սերժ Սարգսյանը:

Նիստի մեկնարկից առաջ լրագրողների հետ զրուցեց ԱԺ ՀՀԿ խմբակցության ղեկավար Վահրամ Բաղդասարյանը: Անդրադառնալով սահմանադրական բարեփոխումներին' ՀՀԿ խմբակցության ղեկավարը կարծիք հայտնեց, որ դրանք նպաստելու են երկրում առկա սոցիալական խնդիրների լուծմանը:

Լրագրողներից մեկի հարցին' ՀՀԿ-ն կարողացե՞լ է ԲՀԿ-ին համոզել կողմ լինել սահմանադրական բարեփոխումներին, Բաղդասարյանն ընդգծեց, որ իրենք որևէ մեկին չեն համոզում: «Մենք որևէ մեկին չենք համոզում, իրենք են կողմնորոշվում»,- ասաց պատգամավորը:

Հարցին' կարողացե՞լ են այնպես անել, որ ԲՀԿ-ն կողմնորոշվի ի օգուտ ՀՀԿ-ի, Բաղդասարյանն ընդգծեց, որ իրենք ներկայացնում են հայեցակարգը, իսկ քաղաքական ուժերը ներկայացնում են իրենց կարծիքը:

Անդրադառնալով այն դիտարկմանը, թե անիմաստ չեն արդյոք սահմանադրական բարեփոխումների վերաբերյալ քննարկումներն այլ քաղաքական ուժերի հետ, պատգամավորը նշեց, որ քաղաքական հանդիպումներն ու քննարկումները երբեք անիմաստ չեն կարող լինել:

Լրագրողներից մեկի հարցին էլ, թե քանի անգամ են իշխանությունները հաշվի առել ժողովրդի կարծիքը, Վահրամ Բաղդասարյանը նշեց, որ ժողովրդի կարծիքը միշտ էլ հաշվի առել են:

Նիստից առաջ լրագրողների հետ զրուցեց նաև ՀՀԿ փոխնախագահ, ՀՀ կրթության և գիտության նախարար Արմեն Աշոտյանը: Հարցին, թե ինչ-որ սենսացիոն հայտարարություններ լինելո՞ւ են նիստի ընթացքում, ինչպես գրել է մամուլը, Արմեն Աշոտյանն նկատեց, որ ՀՀԿ գործադիր մարմնի յուաքաչնյուր նիստ կարևոր քաղաքական իրադարձություն է ներքաղաքական կյանքում՝ ընդգծելով, որ բնական է համարում հարցը, որ այսօրվա նիստից նման ակնկալիքներ կարող են լինել։

Մեկնաբանելով հարցը' հնարավո՞ր է, որ իշխանություններն անցում կատարեն կառավարման խորհրդարանական համակարգին, ՀՀԿ փոխնախագահը նշեց․ «Կարծում եմ՝ դուք չեք կարդացել սահմանդրական բարեփոխումների հայեցակարգը, հակառակ պարագայում նման տեսակի հարցադրում նման ուղիղ ձևով այս պահին չէիք անի»։