Դեր Զորից բերված մասունքները կամփոփվեն Ստեփանակերտի զանգակատանը

Լեռնային Ղարաբաղի Հանրապետությունում Հայոց ցեղասպանության 100-րդ տարելիցի միջոցառումները միայն ապրիլի 24-ին հիշատակելով չեն սահմանափակվի: Միջացառումներ, գիտաժողովներ, մշակութային և քաղաքական հանդիպումներ նախատեսվում է անցկացնել ողջ տարվա ընթացքում: «Արմենպրես» -ի հետ զրույցում ԼՂՀ նախագահի մամուլի խոսնակ Դավիթ Բաբայանը շեշտում է, որ ապրիլի կեսերին Արցախի մայրաքաղաքում տեղի կունենա Հայոց ցեղասպանության զոհերին նվիրված հուշարձան-զանգակատան բացման արարողությունը:

«Այն յուրատեսակ կառույց է և կդառնա Հայոց ցեղասպանությանը նվիրված կարևորագույն հուշակոթողն Արցախում: Զանգակատան հիմքում կթաղվեն Դեր Զորից բերված մասունքները, որոնք մեզ է տրամադրել Հայոց ցեղասպանության թանգարան ինստիտուտը: Զանգակատունը կդառնա մի վայր, որտեղ արցախցիները կգան և իրենց հարգանքի տուրքը կմատուցեն»,- ասաց Դավիթ Բաբայանը:

Տարվա ընթացքում կանցկացվեն գիտական միջոցառումներ, որին կմասնակցեն նաև միջազգային հեղինակավոր մասնագետներ: «Կքննարկվեն ոչ միայն Հայոց ցեղասպանության մասին նյութերը, փաստերը, այլև ցեղասպան քաղաքականությունը Թուրքիայում և Ադրբեջանում: Հայոց ցեղասպանության շրջանն ընդգրկել է Արցախը. 1920թթ. տեղի են ունեցել Շուշիի ջարդերը: Այդ ցեղասպան քաղաքականությունը շարունակվել է նաև 20-րդ դարի վերջին Սումգայիթում, Բաքվում, Կիրովաբադում, Շահումյանում: Այս ամենը դիտարկում ենք մեկ թեմայով: Մենք համոզված ենք, որ Ցեղասպանությունը հնարավոր եղավ պետականություն չունենալու պայմաններում: Հետևաբար, միակ և ամենաարդյունավետ մեթոդը ցեղասպանությունից խուսափելու'ուժեղ պետության առկայությունն է, որը մենք այսօր ունենք: Մեկ հայրենիք երկու պետություն. սա մեր ամենամեծ նվաճումն է ամենամեծ ձեռքբերումը, որը պետք է կարողանանք պահպանել և զարգացնել»,- ասաց Դավիթ Բաբայանը:

Հայոց ցեղասպանության տարելիցին Արցախում ավելի քան երեք տասնյակ մշակութային և երիտասարդական միջոցառումներ կիրականացվեն: Դրանք համերգներ են, ներկայացումներ, ցուցահանդեսներ:

«Արցախի պետական կամերային նվագախումբը 100-րդ տարելիցին նվիրված համերգներով հանդես կգա Լոս Անջելեսում և Բոստոնում: Կկայանա Հրայր Բազեի «100» ֆոտոալբոմի շնորհանդեսը: Հայոց ցեղասպանության 100-րդ տարելիցին նվիրված Շուշիում կկայանա նաև «Ռեքվիեմ» ներկայացումը, որի նախաձեռնողը Լյուբով Կազարնովսկայան է»,- ասաց ԼՂՀ մշակույթի նախարար Նարինե Աղաբալյանը' հավելելով, որ միջոցառումների, գիտական քննարկումների ժամանակ պահանջատիրության հետ միասին կներկայացվեն ազգային-ազատագրական մարտերը, ինքնապաշտպանական մարտերը:

Հասմիկ Հարությունյան