Disney ընկերությունն սկսել է «Սառը սիրտը» մուլտֆիլմի երկրորդ մասի արտադրությունը

The Walt Disney ընկերությունն սկսել է պատմության մեջ ամենահասութաբեր մուլտիպլիկացիոն ֆիլմի՝ «Սառը սրտը» կինոնկարի արտադրությունը: Այս մասին ՏԱՍՍ-ին հայտնել են ընկերության՝ Ռուսաստանի ստորաբաժանմունքում:

«Սան Ֆրանցիսկոյում բաժնետերերի հետ մարտի 12-ին կայացած հանդիպման ժամանակ The Walt Disney Company-ի նախագահ Բոբ Այգերը Walt Disney Animation Studios-ի և Pixar Animation Studios-ի ստեղծագործական տնօրեն Ջոն Լասետերի հետ համատեղ պաշտոնապես հայտարարել են «Սառը սիրտը» անիմացիոն ֆիլմի շարունակության արտադրությունն սկսելու մասին: Որպես ֆիլմի ռեժիսորներ՝ կրկին հանդես կգան «Օսկար» մրցանակի դափնեկիրներ Ջենիֆեր Լին և Քրիս Բաքը, իսկ պրոդյուսեր՝ Փիտեր Դել Վեկոն»,- ասել են ընկերությունում:

«Սառը սիրտը» մուլտֆիլմը՝ 150 միլիոն դոլար բյուջեով, էկրաններ է բարձրացել 2013 թվականին և ամբողջ աշխարհում հավաքել է 1,3 միլիարդ դոլար: Մինչ այդ, միակ անիմացիոն ֆիլմը, որից դրամամուտքերը գերազանցել են մեկ միլիարդի նշագիծը, եղել է «Խաղալիքների պատմության» երրորդ մասը:

Բացի դրամարկղային նվաճումներից, կինոժապավենը դարձել է կինեմատոգրաֆիական խոշորագույն պարգևների դափնեկիր, որոնց թվում են նաև երկու «Օսկար»-ները՝ լավագույն անիմացիոն ֆիլմի համար և լավագույն երգի՝ "Let it go"-ի համար: