«Այլևս երբեք…». տարբեր երկրներում կցուցադրվեն ցեղասպանության մասին պատմող ֆիլմեր

«Այլևս երբեք…». հենց այս խորագրի ներքո մի շարք երկրներում կներկայացվեն Հայոց ցեղասպանությանն առնչվող ֆիլմեր: Կինոյի լեզվի միջոցով միջազգային հանրությանը կներկայացվի 20-րդ դարի սկզբի ամենասոսկալի ոճիրներից մեկը: Նախաձեռնության հեղինակը «Ոսկե ծիրան» կինոյի զարգացման հասարակական կազմակերպությունն է՝ Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի և ՀՀ մշակույթի նախարարության հետ համագործակցությամբ:

ՀՀ մշակույթի նախարարի տեղակալ Ներսես Տեր-Վարդանյանը մարտի 13-ին «Այլևս երբեք…» ծրագրին նվիրված մամուլի ասուլիսում նշեց, որ այն առանձնահատուկ նշանակություն ունի:

«Կինոն արվեստի ամենամատչելի լեզուներից է, որով հնարավոր է հստակ ասելիք փոխանցել: Մենք մի շարք երկրներում կկազմակերպենք կինոդիտումներ, որոնք զուգորդված կլինեն նաև ներկայացումներով: Հեղինակավոր մի շարք մարդիկ կանցկացնեն սեմինարներ»,- «Արմենպրես» -ի փոխանցմամբ՝ նշեց Ներսես Տեր-Վարդանյանը:

Նա հավելեց, որ ցուցադրվող ֆիլմերից է նաև հայտնի «Սպի»-ն: ՀՀ մշակույթի նախարարի տեղակալի համոզմամբ՝ նման կինոցուցադրությունների միջոցով նաև արտասահմանյան մամուլը կանդրադառնա Հայոց ցեղասպանության տարելիցին:

«Այլևս երբեք…» ծրագրի համակարգող Րաֆֆի Մովսիսյանը տեղեկացրեց, որ նախաձեռնությունը մեկնարկեց փետրվարի 24-ին Բելառուսի Հանրապետության մայրաքաղաք Միսնկում:

«Անիվ» հայագիտական ուսումնասիրությունների կազմակերպության աջակցությամբ Բելառուսի պետական համալսարանի պատմության ֆակուլտետի ուսանողների համար փետրվարի 24-ին կազմակերպվեց Կառլա Կարապետյանի «Ճչացողները» ֆիլմի հատուկ ցուցադրությունը: Իսկ փետրվարի 25-ին Մինսկի «Միր» կինոթատրոնում տեղի ունեցավ «Այլևս երբեք…» ծրագրի պաշտոնական բացման արարողությունը և ռեժիսորի մասնակցությամբ ցուցադրվեց «Ճչացողները» ֆիլմը: Ընդհանուր առմամբ, Բելառուսում ցուցադրվել է լիամետրաժ, կարճամետրաժ և վավերագրական 7 ֆիլմ, այդ թվում՝ Սյուզան Խարտալյանի «Տատիկի դաջվածքները», Ատոմ Էգոյանի «Արարատ», Անրի Վերնոյի «Մայրիկ», Արա Երնջակյանի «Խավարում», Ներսես Հովհաննիսյանի «Հանդիպում ցուցահանդեսում» և Սերժ Ավետիքյանի «Շների կղզին» ֆիլմերը:

«Այլևս երբեք…» ծրագիրը հաջորդիվ մեկնարկեց Գերմանիայի մայրաքաղաք Բեռլինում: Մարտի 7-ին Բեռլինի Մաքսիմ Գորկու անվան թատրոնում տեղի ունեցավ ծրագրի բացման արարողությունը:

«Հատուկ հրավիրյալների թվում էին նաև կանադահայ կինոռեժիսոր Ատոմ Էգոյանը և դերասանուհի Արսինե Խանջյանը, ովքեր ներկայացրին տեսաինստալյացիա' նվիրված «Հոշոտված Հայաստան» ֆիլմի գլխավոր դերակատար և սցենարի հեղինակ Ավրորա Մարդիգանյանին»,- տեղեկացրեց Մովսիսյանը:

«Ոսկե ծիրան» միջազգային կինոփառատոնի գեղարվեստական ղեկավար Սուսաննա Հարությունյանն ընդգծեց, որ հավանաբար այս տարվա ապրիլին ցուցադրություններ կլինեն նաև Թուրքիայում: «Ֆիլմերի ցանկը ճշտվում է»,- հավելեց Սուսաննա Հարությունյանը:

Ցուցադրությունների համար ընտրվել են Հայոց ցեղասպանության մասին պատմող լավագույն խաղարկային և վավերագրական ֆիլմերը: Յուրաքանչյուր երկրի համար կազմվում է առանձին ծրագիր՝ հաշվի առնելով ֆիլմի քաղաքական, մշակութային և գեղարվեստական առանձնահատկությունները:

Մինչև «Ոսկե ծիրան» Երևանի միջազգային կինոփառատոնի մեկնարկը «Այլևս երբեք…» ծրագրի շրջանակում ցուցադրություններ տեղի կունենան նաև Բուլղարիայում, Ռուսաստանում, Լեհաստանում, Ֆրանսիայում, Թուրքիայում, Իրանում և Շվեյցարիայում:

Ցուցադրությունները կշարունակվեն նաև «Ոսկե ծիրան» փառատոնից հետո: