Հայ, թուրք և եվրոպացի գործիչները կոչ են արել Ցեղասպանության տարելիցին լինել Ստամբուլում

Հայկական բարեգործական ընդհանուր միությունը (AGBU) Եվրոպական հասարակական հակացեղապաշտական (EGAM) և թուրքական «Ոչ ասա ռասիզմին և խտրականությանը» (DurDe) կազմակերպությունների հետ համատեղ կոչ է հրապարակել' ապրիլի 24-ին Հայոց ցեղասպանության հարյուրերորդ տարելիցը գնալ և հիշատակել Ստամբուլում: «1915-2015. Հայոց ցեղասպանությունը միասին հիշատակենք Թուրքիայում» խորագիրը կրող կոչի տակ ստորագրել են այնպիսի գործիչն եր, ինչպիսիք են գերմանացի քաղաքական գորիծիչ Դանիել Քոն Բենդիթը և ֆրանսիացի քաղաքական գործիչ Բերնարդ Քոուհները: «Արմենպրես»-ը ներկայացնում է կոչի տեքստն ամբողջությամբ.

«1915-2015թթ. hարյուր տարի է անցել այն օրից, երբ Օսմանյան կայսրությունում իրականացվեց Հայոց ցեղասպանությունը՝ մի ոճրագործություն, որի ընթացքում մեկ ու կես միլիոն հայեր կոտորվեցին: Հարյուր տարի շարունակ այս ոճրագործության մերժումը թուրքական պետության քաղաքականության ու դիվանագիտության հիմքն է, պետություն, որը մասամբ հիմնադրվել է հայերի ունեցվածքը բռնագրավելու ու նրանց մշակույթը ոչնչացնելու շնորհիվ:

Արդեն հարյուր տարի է, ինչ այս ցեղասպանության մերժումն ու անտարբերությունը շարունակում է վնասներ պատճառել, սնել ուժգին ազգայնամոլություն և ռասիզմ, զարգացնել հակամարտություն և խեղդել ժողովրդավարությունն ու խոսքի ազատությունը Թուրքիայում:

Տարիներ շարունակ թվով ավելի շատ մարդիկ, աջակցություն ստանալով Եվրոպական քաղաքացիական հասարակությունից, բարձրաձայնում են ցեղասպանության թեման Թուրքիայի քաղաքացիական հասարակությունում՝ կոչ անելով ընդունել ցեղասպանության փաստը և հիշատակել Հայոց ցեղասպանությունը Թուրքիայում նույնպես: Այս տարի Թուրքիան ցինիկաբար նախատեսել է նշել Գալիպոլիի ճակատամարտի հիշատակման օրը հենց ապրիլի 24-ին՝ նպատակ ունենալով ստվերել Հայոց ցեղասպանության հիշատակումը:

Բացի այդ, Թուրք պաշտոնյաները ջանքեր չեն խնայում կանխելու միջազգային ներգրավվածությունն այդ հարցում: Մենք՝ եվրոպացիներս, հայերը, թուրքերը և քրդերը, ովքեր նախաձեռնել, կազմակերպել, աջակցել կամ մասնակցել են ցեղասպանության հիշատակման միջոցառումներին, կո՛չ ենք անում բոլորին, ովքեր արդարության կողմնակից են, համախմբվել և խաղաղ ճանապարհով ապրիլի 24-ին Ստամբուլում միասին հիշատակել հայերի նկատմամբ իրականացված ցեղասպանությունը:

Այս ցեղասպանության հիշատակումը վերաբերում է ոչ միայն թուրքերին և հայերին, այլև ողջ մարդկությանը: Այսօր ցեղասպանության մերժման դեմ պայքարի առաջնահերթությունը ընկած է նաև թուրքական հասարակության հիմքերում: Մեր համատեղ քարոզարշավն համընդհանուր բնույթ է կրում: Սա ապագայում համերաշխության, արդարության և ժողովրդավարության հաստատմանն ուղղված քարոզարշավ է:

Սա համերաշխությանն ուղղված մի քարոզարշավ է այն մարդկանց համար, ովքեր պայքարում են պատմական ճշմարտության հաստատման համար: Անջրպետը թուրքերի և հայերի միջև չէ, այլ ցեղասպանության փաստը ժխտողների և նրանց դեմ պայքարողների՝ անկախ նրանց ծագումից և ազգային պատկանելությունից: Սա արդարության հաստատմանն ուղղված քարոզարշավ է: Ցեղասպանությունն ամենաբռնի քաղաքական գործողությունն է, որին ռասիզմը կարող է հանգեցնել, իսկ դրա ժխտումը մաս է կազմում այդ գործողության: Պայքարել ժխտողականության դեմ նշանակում է պայքարել ռասիզմի, հետևաբար, նաև ավելի հավասար և արդար հասարակության ստեղծման համար: Սա ժողովրդավարությունը տարածող քարոզարշավ է: Հիշել բոլոր նրանց, ովքեր անհետացել են. սա մարդասիրական և խորհրդանշական փոխհատուցման մի գործողություն է, որը մասնակից է դարձնում մեզ բոլորիս: Հիշատակել Հայոց ցեղասպանությունը Թուրքիայում նշանակում է նպաստել խոսքի ազատությանն այդ երկրում, ինչպես նաև բացահայտել այդ երկրի իշխանությունների հակաժողովրդավարական բնույթի բուն հիմքերը: Հիշատակել Հայոց ցեղասպանությունը Թուրքիայում հնարավորություն է տալիս բոլորին, մասնավորապես երիտասարդ սերնդին, համ ախմբվելու համընդհանուր ժողովրդական արժեքների շուրջ՝ պատմական արդարության վերականգնման և ավելի պայծառ ապագա ստեղծելու ձգտումով: Կո՛չ ենք անում բոլոր նրանց, ովքեր կիսում են այս արժեքները և տեսլականը, միանալ մեզ և հիշատակել Հայոց ցեղասպանության 100-րդ տարելիցը ապրիլի 24-ին Թուրքիայում»: