Ուկրաինացիների մեկ երրորդը պաշտպանում է զիջումների գնով Դոնբասում պատերազմի դադարեցումը

Ուկրաինայի բնակչության երրորդ մասն այն կարծիքին է, որ, հանուն Դոնբասում արյունահեղության դադարեցման, հանրապետության իշխանությունը պետք է գնա ցանկացած զիջումների: Միևնույն ժամանակ, բնակչության 20 տոկոսից ավելին կարծում է, որ ոչ մի զիջման մասին խոսք լինել չի կարող: Ինչպես տեղեկացնում է «Արմենպրես&raqu o;-ը, այդ են վկայում GfK Ukraine-ի փետրվարյան հարցման տվյալները:

Սոցիոլոգիական հետազոտության՝ մարտի 13-ին հրապարակված արդյունքների համաձայն՝ զիջումների թվում, որոնց ուկրաինական իշխանությունը կարող է գնալ հանուն երկրի արևելքում հակամարտության դադարեցման, հարցման մասնակիցների 21 տոկոսը նշել է Դոնեցկի և Լուգանսկի ինքնահռչակ ժողովդական հանրապետությունների հսկողության տակ գտնվող տարածքներին որոշակի ժամանակաշրջանում հատուկ կարգավիճակ տրամադրելը՝ Կիևի մասնակի վերահսկողությամբ:

Հարցվածների 12 տոկոսը նշում է Ուկրաինայի ամբողջ տարածքում ռուսաց լեզուն երկրորդ պետական լեզու ճանաչելու հնարավորությունը՝ Սահմանադրության մեջ դրա ամրագրմամբ:

Մասնակիցները ևս մեկ զիջում են նշում՝ ՆԱՏՕ-ի կազմ մտնելու մտադրությունից հրաժարվելը և Հիմնական օրենքով Ուկրաինայի չեզոքության ամրագրումը (11 տոկոս):

Միևնույն ժամանակ հարցման մասնակիցների 21 տոկոսն այն կարծիքն է հայտնել, որ իշխանությունները ոչ մի զիջման չպետք է գնան, այլ պետք է մոբիլիզացնեն բնակչությանը, հասնեն Արևմուտքի օգնությանը և Դոնբասն ազատագրեն ռազմական ճանապարհով:

Ինչպես նշում է «Ինտերֆաքս»-ը, GfK Ukraine-ն փետրվարի 2-ից 15-ը հարցումն անցկացրել է մասնակցի տանն անհատական հարցազրույցի մեթոդով: Հարցմանը մասնակցել է 16-ից բարձր տարիքի հազար մարդ՝ Ուկրաինայի բոլոր մարզերում, բացի Ղրիմից: Դունեցկի և Լուգանսկի մարզերում հարցումն անցկացվել է ուկրաինական իշխանության հսկողության տակ գտնվող տարածքում: Վիճակագրական սխալանքը չի գերազանցում 3,1 տոկոսը: