«Մեր հարևանները օժտված են ուրիշի ստեղծածը զավթելու ունակությամբ». Յուրի Բաղդասարյան

Բաքվում ծնված մանկավարժ, մաթեմատիկոս Յուրի Բաղդասարյանը հանրության դատին է ներկայացրել «Բաքուն և հայերը, հակահայկական քաղաքականությունն ու հայերի էթնիկական մաքրումը Ադրբեջանում» գիրքը:

«Մեր հարևանները պատմականորեն օժտված են ուրիշի ստեղծածը զավթելու ունակությամբ: Իմ գրքում ես փորձել եմ նկարագրել անցած դարաշրջանի հասարակական-քաղաքական այն միջավայրը, որտեղ ապրել և ստեղծագործել է Բաքվի 400 հազարից ավելի կազմող հայ համայնքը: Ներկայացրել եմ սոցիալ-տնտեսական վիճակը և կապը Հայաստանի հետ, ինչպես նաև քաղաքական դաշտում համայնքի անզորությունն ու անհեռանկար ապագան»,- «Արմենպրես»-ի հաղորդմամբ՝ լրագրողների հետ մարտի 14-ին կայացած հանդիպմանը հայտնեց Յուրի Բաղդասարյանը:

Գրքում մանրամասն նկարագրված է մոտեցող ողբերգության վերջին ազդանշանը՝ 1987թ.-ին Չարդախլու գյուղի հայաթափ լինելը և դրան հաջորդող՝ Սումգաիթի, Կիրովաբադի և Բաքվի հայկական ջարդերը: Ներկայացված է նաև արցախցիների ազատագրական պայքարն ու հաղթարշավը, ինչպես նաև՝ Խորհրդային Միության վարած քաղաքականությունը:

Գրքի հեղինակը նշեց, որ մասնակցել է Ադրբեջանում 1988 թվականին տեղի ունեցած ցույցերին: «Ես փորձում էի հասկանալ ադրբեջանցիների տրամադրվածությունը և, լսելով այնտեղ հնչող հայտարարությունները, շատ արագ հասկացա, որ իրենք նպատակադրված են վերացնելու Բաքվի հայերին»,- շեշտեց Բաղդասարյանը և հավելեց, որ իր գրքում նա գրել է այն, ինչ տեսել է և զգացե: «Պատկառելի տարիքում հետադարձ հայացք կատարելու անհրաժեշտություն զգացի, որ հեռանալիս պետության առջև պարտքի զգացում չունենամ, քանի որ իմ հիշողությունները կարող են օգտակար լինել պետու թյանը»,- պարզաբանեց նա: