Ռեժիսոր Ժիրայր Աղավելյանի ցուցահանդեսը նվիրված է Հայոց ցեղասպանության 100-րդ տարելիցին

Ռեժիսոր Ժիրայր Աղավելյանի «Ճակատագրի հետքերով» խորագիրը կրող ցուցահանդեսը, որը նվիրված է Հայոց ցեղասպանության 100-րդ տարելիցին, սկսվում է բնության ու հոգու պայթյունով և ավարտվում արևոտ գարնանային առավոտով: Դա ռեժիսոր, լուսանկարիչ, բանաստեղծ և երաժիշտ Ժիրայր Աղավելյանի 5-րդ ցուցահանդեսն է Երևանում:

«Իմ բոլոր աշխատանքներում ես փորձում եմ հոգևոր կապ ստեղծել հանդիսատեսի հետ: Ես աշխատել եմ այնպես անել, որպեսզի մարդիկ, դիտելով իմ ստեղծագործությունները, նույնպես արարեն», - ցուցահանդեսի բացմանը «Արմենպրես»-ի հետ զրույցում նշեց Ժիրայր Աղավելյանը:

Ցուցահանդեսի ընթացքում ցուցադրվում էին արվեստագետի նկարների հիման վրա ստեղծված կարճամետրաժ «Ճակատագր» և «Ճակատագրի հետքերով» ֆիլմերը:

«Ճակատարգրի բերումով, ռեժիսուրայի բնագավառում մասնագիտացված Ժիրայրն, իր փնտրտուքներին հետևելով, զբաղվում է նոր ուղղությամբ՝ ֆոտորեժիսուրայով, որի հիմքը լուսանկարն է. այն փոխակերպվելով' նա ստանում է նոր իմաստ և բովանդակություն», - ասաց ցուցահանդեսի համադրող Սուսաննա Խանվելյանը:

Աղավելյանի խոսքով՝ նա Ցեղասպանությունը չի ուզում ներկայացնել մուգ և սև գույներով, ինչես մարդիկ սովորաբար ընտրում են, այլ ցանկացել է ասել, որ վերջում, միևնույն է, հայ ազգը ծաղկում և ապրում է իր նոր գույներով, նոր ձևով: «Սա մեր ճակատագիրն է, որը պետք է տանենք առաջ», - հավելեց արվեստագետը:

Ծնունդով Հայաստանից, Լենինգրադի (ներկայիս Սանկտ Պետերբուրգ) Կուլտուրայի ինստիտուտի կինոյի բաժնի շրջանավարտ, հայկական հեռուստաալիքներում որպես ռեժիսոր աշխատած Ժիրայր Աղավելյանը հեղինակել է շուրջ մեկ տասնյակ գեղարվեստավավերագրական ֆիլմեր, ինչպես օրինակ' «Վարդանանք»-ը /1984թ./, «Քարերի սիմֆոնիա»-ն /1987թ./, «Հավերժի Ճամփորդը» /1989թ./, «Գոյատեւելու հայկական պայքարը» /1993թ./, որոնք մասնակցել են միջազգային տարբեր փառատոնների: Նա 1991թ.-ից բնակվում է Բոստոնում, որտեղ Աղավելյանն իր աշխատանքներով մասնակցել են տասնյակ ցուցա հանդեսների: