«Եվրանեսթ» ԽՎ համանախագահին մտահոգում է ադրբեջանական պատվիրակության բացակայությունը

«Եվրանեսթ» խորհրդարանական վեհաժողովի համանախագահ Բորիս Տարասյուկին մտահոգում է այն հանգամանքը, որ վեհաժողովի՝ Երևանում անցկացվող լիագումար նիստին չի մասնակցում ոչ միայն ադրբեջանական պատվիրակությունը, այլև ներկա չեն նույնիսկ քաղաքացիական հասարակության ներկայացուցիչները:

Հիշեցնենք, որ ինչպես տեղեկացրել էր Լուրեր.com-ը, Երևանում մեկնարկել է Եվրամիության Արևելյան գործընկերության «Եվրանեսթ» խորհրդարանական վեհաժողովի չորրորդ նստաշրջանը։ Նստաշրջանի քառօրյա աշխատանքներին կմասնակցեն Արևելյան գործընկերության անդամ բոլոր երկրների պատվիրակությունները, բացի Ադրբեջանից:

Երևանում «Եվրանեսթ» խորհրդարանական վեհաժողովի և քաղաքացիական հասարակության համատեղ քննարկման ընթացքում Բորիս Տարասյուկը մտահոգություն հայտնեց, որ Ադրբեջանից քաղաքացիական հասարակության ներկայացուցիչներ չեն մասնակցում քննարկմանը: «Եվրանեսթ»-ի բյուրոն անցած ամիս քննարկել է Երևանում կայանալիք խորհրդարանական վեհաժողովի նիստին ադրբեջանական կողմի մասնակցությունը: Մենք նամակ ենք ուղարկել Ադրբեջանի խորհրդարանի խոսնակին, որպեսզի վերանայեն Երևանում անցկացվելիք «Եվրանեսթ» խորհրդարանական վեհաժողովի աշխատանքներին չմասնակցելու իրենց որոշումը: Ցավոք, պատվիրակությունը չեկավ, սակայն ես այն կարծիքին եմ, որ սա չպետք է բացառի քաղաքացիական հասարակության ներկայությունն այս քննարկումներին: Բացի դրանից, ցանկանում եմ նշել, որ մենք ամեն ինչ արել ենք, որպեսզի ադրբեջանական պատվիրակությունը մասնակցեր խորհրդաժողովի աշխատանքներին, ամեն ինչ արել ենք նրանց համոզելու համար, սակայն սա նրանց որոշումն էր»,- «Արմենպրես»-ի հաղորդմամբ՝ շեշտեց Տարասյուկը:

Արևելյան գործընկերության քաղաքացիական հասարակության ֆորումի կոմիտեի համանախագահ Քշիշտոֆ Բոբինսկին, անդրադառնալով թեմային, ընդգծեց, որ իրենք Ադրբեջանում գործ ունեն բավականին նուրբ և բավականին դժվար իրավիճակի հետ: « Ադրբեջանական քաղաքացիական հասարակության պլատֆորմի հետ մեր հարաբերությունները ևս այնքան էլ դյուրին չեն: Ունեն մարդիկ, ովքեր բանտարկված են, աքսորված են, երկրից դուրս են և ունեն կոնկրետ պատճառներ, որ այս քննարկմանը ներկա չեն»,- նշեց Բոբինսկին:

Թեմային անդրադարձավ նաև ԱԺ «Ժառանգություն» խմբակցության պատգամավոր Թևան Պողոսյանը, ով կարծիք հայտնեց, որ որևէ մեկի համար գաղտնիք չէ, թե ինչու «Եվրանեսթ» խորհրդարանական վեհաժողովի ադրբեջանական պատվիրակությունը և քաղաքացիական հասարակության ներկայացուցիչները ներկա չեն վեհաժողովի աշխատանքներին: «Եթե վերջին երկու տարվա կտրվածքով նայենք, ցանկացած հասարակական կազմակերպություն կամ ակտիվիստ, որը մասնակցել է տարածաշրջանային որևէ ծրագրի, որում եղել է հայկական մասնակցություն, այսօր գտնվում է կամ բանտում, կամ էլ փախել է Ադրբեջանից՝ բանտում չհայտնվելու համար: Այնպես որ, այդ վախի մթնոլորտը, որ ձևավորվել է Ադրբեջանում, ստիպել է, որ նույնիսկ Ադրբեջանի քաղաքացիական հասարակության ներկայացուցիչներն այստեղ ներկա չլինեն: Եթե եղել է քաղաքական համաձայնություն, որ հայկական պատվիրակությունը պետք է սկզբում մասնակցեր Բաքվում ընթացող «Եվրանեսթ» խորհրդարանական վեհաժողովի աշխատանքներին, իսկ հետո ադրբեջանական կողմը՝ Երևանում անցկացվելիք նիստին, չի հարգվել, ապա պատկերացրեք, թե որքան թույլ են քաղաքացիական հասարակության դիրքերն Ադրբեջանում»,- ընդգծեց պատգամավորը:

Տարածաշրջանային հետազոտությունների կենտրոնի ղեկավար Ռիչարդ Կիրակոսյանն էլ ընդգծեց, որ Ադրբեջանը հերթական հնարավորությունն է բաց թողել՝ որոշում կայացնելով չմասնակցել Երևանում անցկացվող «Եվրանեսթ» խորհրդարանական վեհաժողովի լիագումար նիստին: Ռիչարդ Կիրակոսյանը շեշտեց, որ սա Ադրբեջանի դժբախտությունն է: