Lockheed Martin-ը եռատարր ճանապարհ կստեղծի դեպի խորը տիեզերք ճանապարհորդությունների համար

Գիտություն և Մշակույթ 16 Մարտ, 2015 22:23

Lockheed Martin-ը պլանավորել է անդրմայրցամաքային երկաթուղու անալոգն ստեղծել խորը տիեզերքում մարդու ճանապարհորդությունների համար: Այդ մասին, ինչպես տեղեկացնում է «Արմենպրես»-ը, հաղորդվում է ընկերության կայքի մամուլի տեղեկագրում:

«Ճանապարհի» համակարգը ներառում է երեք տարր. Jupiter քարշիչը, Exoliner բեռնատար կոնտեյները և ռոբոտ-մանիպուլյատորը: Այս երեք բաղադրիչների նախագծման համար Lockheed Martin-ը կօգտագործի արդեն ստուգված այն տեխնոլոգիաները, որոնք տիեզերքում օգտագործում են ԱՄՆ-ը և նրա գործընկերները:

Սպասվում է, որ Jupiter քարշիչը, բեռնատար կոնտեյները և ռոբոտ-մանիպոլյատորը տիեզերք կարձակվեն Atlas V ծանր դասի տանող հրթիռի միջոցով: Արդեն ուղեծրում քարշիչն օգտակար բեռով կոնտեյները կհասցնի Միջազգային տիեզերակայան, ձեռքի միջոցով դրան կկցի Exoliner-ը և կվերադառնա ավելի ցածր ուղեծիր այլ խնդիրների լուծման, օրինակ արբանյակների հետ տարբեր մանիպուլացումների համար:

Երկրից հրթիռի հաջորդ արձակման ժամանակ արդեն ուղեծրում Jupiter-ը վերցնում է հին Exoliner-ը (օրինակ՝ աղբով) և Միջազգային տիեզերակայան հասցնում նոր կոնտեյները: Մասնագետները նշում են, որ փոխադրման այդ սխեման էժան կլինի գոյություն ունեցողներից (այդ թվում ռուսաստանյան «Սոյուզների» կամ Միացյալ Նահագների SpaceX մասնավոր ընկերության Dragon տիեզերանավերի օգտագործմամբ):

Միացյալ Նահանգների Lockheed Martin կորպորացիան ռազմական և օդատիեզերական տեխնիկայի՝ աշխարհում խոշորագույն մշակողներից և արտադրողներից մեկն է: Դրա հիմնական պատվիրատուն է ԱՄՆ-ի պաշտպանության նախարարությունը: Ընկերությունում աշխատում է շուրջ 120 հազար մարդ, 2013 թվականին կորպորացիայի վաճառքների ծավալները կազմել են 35,5 միլիարդ դոլար: