«Եվրանեսթ» ԽՎ քաղաքական հանձնաժողովը չի ընդունել ադրբեջանական պատվիրակության առաջարկները

«Եվրանեսթ» խորհրդարանական վեհաժողովի քաղաքական, մարդու իրավունքների և ժողովրդավարության հարցերի մշտական հանձնաժողովը հաստատեց Եվրամիության հետ ակտիվ գործընկերության շրջանակներում նոր հարևանության քաղաքականության գործիքակազմը կիրառելու մասին բանաձևը: Բանաձևում չեն ներառվել ադրբեջանական պատվիրակության առաջարկները, որոնք վերաբերել են ԼՂ հակամարտության կարգավորմանը: Նիստի ավարտից հետո լրագրողների հետ զրույցում «Եվրանեսթ» խորհրդարանական վեհաժողովի հայաստանյան պատվիրակության ղեկավար Արտակ Զաքարյանն ընդգծեց, որ Ադրբեջանը բանաձևում ներառելու համար երեք առաջարկ էր ներկայացրել, որոնցից երկուսը վերաբերել են ԼՂ հակամարտության կարգավորմանը:

«Մեր պատվիրակության անդամները հանձնաժողովի անդամներին խնդրեցինք, որպեսզի նրանք կողմ չքվեարկեն ադրբեջանական պատվիրակության առաջարկներին: Ադրբեջանի պատվիրակության երկու առաջարկներ, որոնք վերաբերում էին Լեռնային Ղարաբաղի հակամարտությանը և մեզ համար անընդունելի էին, մերժվեցին հանձնաժողովի կողմից: Իսկ առաջարկներից մեկը, որը հակամարտությանն ուղիղ չէր առնչվում, սակայն կրկին մեզ համար անընդուլի էր, հանձնաժողովը ներառեց զեկույցում: Այսինքն, ըստ էության մեզ համար կարևորագույն խնդիրները զեկույցում չներառվեցին, և հանձնաժողովը չընդու նեց ադրբեջանական պատվիրակության առաջարկները: Ադրբեջանցիների մյուս առաջարկը, որը ներառվել է բանաձևում, մենք դեռ հնարավորություն ունենք քննարկել բյուրոյի նիստում, ինչպես նաև լիագումար նիստում: Ես վաղը կփորձեմ հասնել նրան, րր ադրբեջանական պատվիրակության երրորդ առաջարկը ևս դուրս գա բանաձևից: Այդ առաջարկն այդքան սկզբունքային չէ մեզ համար, և որևէ բան չի փոխում, սակայն ցանկալի կլիներ ապագաի համար, որ դա չներառվեր այդ բանաձևում»,- «Արմենպրես»-ի հաղորդմամբ՝ ընդգծեց Զաքարյանը:

Հանձնաժողովը բանաձևում չի ներառել նաև ադրբեջանական պատվիրակության առաջարկները, ըստ որոնց՝ քանի որ Հայաստանը ԵՏՄ անդամ է, ԵՄ-ն այլևս չպետք է Հայաստանի հետ համագործակցությունը շարունակի:

Արտակ Զաքարյանը հայտնեց նաև, որ հայկական կողմը բանաձևում ներառելու համար ներկայացրել է 9 առաջարկ, որոնցից 3-ը մերժվել են, 6-ը՝ընդունվել: Հանձնաժողովի կողմից մերժված 3 առաջարկներով հայկական պատվիրակությունը փորձել է մեղմել Ուկրաինայի հակամարտության հարցում հակառուսական կոշտ դիրքորոշումները: «Մեր առաջարկներն ավելի շատ խաղաղ, բանակցային ճանապարհով խնդրի լուծում էին ենթադրում, սակայն դրանք մերժվեցին»,- նշեց Զաքարյանը:

Հայկական պատվիրակության մյուս առաջարկները, որոնք վերաբերում էին Արևելյան գործընկերության շրջանակներում համագործակցությանը, ընդունվել են: