Արտակ Զաքարյանը Հայաստանում վերականգնվող էներգետիկայի զարգացման հեռանկարներ է տեսնում

Հայաստանում գնալով ավելի է կարևորվում վերականգնվող էներգետիկայի զարգացման հնարավորությունը: Այս մասին «Եվրանեսթ» խորհրդարանական վեհաժողովի չորրորդ լիագումար նիստի ընթացքում նշեց ԱԺ ՀՀԿ խմբակցության պատգամավոր, «Եվրանեսթ» ԽՎ հայաստանյան պատվիրակության ղեկավար Արտակ Զաքարյանը: «Հայաստանն այն երկրներից մեկն է, որ չիրացված հեռանկարներ ունի վերականգնվող էներգետիկայի , հատկապես, արևային էներգետիկայի առումով»,- «Արմենպրես»-ի հաղորդմամբ՝ նշեց Զաքարյանը:

Պատգամավորը կարծիք հայտնեց, որ Արևելյան գործընկերության երկրների համար էներգետիկ անվտանգությունը կարևոր խնդիր է և միշտ լինելու է ուշադրության կենտրոնում: «Վերականգնվող էներգետիկան՝ որպես էներգետիկայի այլընտրանքային աղբյնուր, իսկ հետագայում նաև ռեսուրս, պահանջում է նաև համապատասխան ներդրումային հնարավորություններ: Ճիշտ կլիներ, որ առաջիկայում մեր կողմից ընդունվելիք զեկույցներում տարբեր ֆոնդերի միջոցով իրականացվելիք ավելի կոնկրետ գործիքներ և ներդրումային հնարավորություններ ներկայացվեին, դրանք վերածվեին գործնական ծրագրերի, և Արևելյան գործընկերության անդամ երկրները կարողանային դրանցից օգտվել»,- մանրամասնեց Զաքարյանը:

Նա ընդգծեց, որ Հայաստանում մասնագիտական, ինչպես նաև բիզնես-միջավայրը հետաքրքրված է վերականգնվող էներգետիկայի ոլորտով, սակայն բոլոր տեխնոլոգիաները մրցակցային գին չեն կարողանում ապահովել: