Տարասյուկը չհաստատեց, որ ուկրաինական պատվիրակությունը դեմ է քվեարկել Հայոց ցեղասպանության բանաձևին

«Եվրանեսթ» խորհրդարանական վեհաժողովում ուկրաինական պատվիրակության անդամ Բորիս Տարասյուկը չի հաստատում, որ ուկրաինական պատվիրակությունը դեմ է քվեարկել Հայոց ցեղասպանության վերաբերյալ բանաձևին, որը ձայների մեծամասնությամբ ընդունվել է վեհաժողովի կողմից: Ազգային ժողովում լրագրողների հետ հանդիպմանը Տարասյուկն ընդգծեց, որ որևէ մեկը չի կարող ասել, թե ինչպես է քվեարկել ուկրաինական պատվիրակությունը, քանի որ անձնական քվեարկությունների տվյալները չեն հրապարակվել, այլ եղել են միայն քվեարկության վերջնական արդյունքները: «Հայոց ցեղասպանության վերաբերյալ բանաձին դեմ է քվեարկել 4 պատվիրակ, սակայն ուկրաինական պատվիրակության կազմում 10 պատգամավոր կա: Այնպես որ, այս հարցում որևէ մեկը միանշանակ բան չի կարող ասել»,- ասաց Տարասյուկը:

Մարտի 17-ին «Եվրանեսթ» խորհրդարանական վեհաժողովը ձայների 33 կողմ և 4 դեմ հարաբերակցությամբ ընդունել է Հայոց ցեղասպանության 100-րդ տարելիցի կապակցությամբ բանաձևը: Քվեարկությունից առաջ ուկրաինական պատվիրակության անդամ, «Եվրանեսթ» ԽՎ համանախագահ Բորիս Տարասյուկը հայտարարել է, որ ուկրաինական պատվիրակությունը վերապահումներ ունի բանաձևի հետ կապված՝ հաշվի առնելով այն հանգամանքը, որ հայկական պատվիրակությունը լիովին չի աջակցել «Ուկրաինայում ՌԴ-ի կողմից իրականացվող ագրեսիան և խաղաղ կարգավորումը» խորագրով բանաձևի ընդունմանը: