Էդվարդ Նալբանդյանն ու Յոհանես Հանը քննարկել են Հայաստան-ԵՄ հարաբերություններին առնչվող հարցեր

Հայաստանի արտգործնախարար Էդվարդ Նալբանդյանը մարտի 18-ին հանդիպել է Երևան ժամանած Եվրոպական հարևանության քաղաքականության և ընդլայնման բանակցությունների հարցերով ԵՄ հանձնակատար Յոհաննես Հանին:

Ողջունելով հյուրին՝ նախարար Նալբանդյանը կարևորել է Հայաստան-Եվրոպական միություն բարձր մակարդակի պարբերական հանդիպումները՝ ընդգծելով, որ դրանք նպաստում են երկկողմ օրակարգի առաջմղմանն ու համագործակցության ընդլանմանը։

Շնորհակալություն հայտնելով ընդունելության համար՝ հանձնակատար Հանը նշել է, որ սա իր առաջին այցելությունն է Հայաստան, որի շրջանակներում արդեն բավականին արդյունավետ քննարկումներ է ունեցել, և հույս է հայտնել, որ այցը նոր լիցք կհաղորդի փոխգործակցությանը:

Զրուցակիցները մտքեր են փոխանակել Հայաստան-Եվրոպական միություն հարաբերությունների իրավական նոր շրջանակի ձևավորման շուրջ: Այս համատեքստում կարևորվել է իրավական փաստաթղթի շուրջ բանակցությունների ապագա մեկնարկը։

Նախարար Նալբանդյանը վերահաստատել է Հայաստանի պատրաստակամությունը' առկա ձեռքբերումների հիման վրա շարունակելու ԵՄ հետ համագործակցության հետագա խորացումը բոլոր ուղղություններով, հնարավոր ոլորտներում՝ հաշվի առնելով ՀՀ պարտավորություններն այլ միջազգային ինտեգրացիոն ձևաչափերում:

Կողմերը կարևորել են 2014թ. հունվարից ուժի մեջ մտած ԵՄ հետ մուտքի արտոնագրային ռեժիմի դյուրացման և ռեադմիսիայի մասին համաձայնագրերը, որոնք ճանապարհ են բացում դեպի մուտքի արտոնագրային ռեժիմի ազատականացման շուրջ բանակցությունների մեկնարկ։

Նախարար Նալբանդյանը երախտագիտություն է հայտնել Հայաստանում ընթացող բարեփոխումներին ԵՄ կողմից ցուցաբերվող շարունակական խորհրդատվական, ֆինանսական աջակցության համար:

Տարածաշրջանային խնդիրների քննարկման համատեքստում հանձնակատար Հանը ԵՄ աջակությունն է հայտնել ԵԱՀԿ Մինսկի խմբի համանախագահների՝ ղարաբաղյան հիմնախնդրի կարգավորմանն ուղղված ջանքերին։

Հանդիպմանը հետևել է նախարար Նալբանդյանի և հանձնակատար Հանի համատեղ մամուլի ասուլիսը: