«Ձևավորվել է երկկենցաղ հայը, ով մինչև 18:00-ն ապրում է որպես թուրք, իսկ դրանից հետո դառնում է հայ». Հրանուշ Հակոբյան

Քաղաքական 18 Մարտ, 2015 21:49

Համայն հայությունը չի լռելու և շարունակելու է իր պայքարը Հայոց ցեղասպանության ճանաչման ու դատապարտման համար: Այս մասին հայտարարեց ՀՀ սփյուռքի նախարար Հրանուշ Հակոբյանը Երևանում անցկացվող «Արարատի ստորոտին» 5-րդ միջազային մեդիախորհրդաժողովի ժամանակ: Նախարարը ներկայացրեց հայկական սփյուռքի պատմությունը, այն փուլերը, որոնց արդյունքում հայերը հաստատվեցին իրենց հայրենիքի սահմաններից դուրս: «Այսօր հաշվարկվում են 7 միլիոնից ավելի հայեր, ովքեր ապրում են Հայաստանից դուրս: Սփյուռքում գործում են 30 հազարից ավելի հայկական կազմակերպություններ, 500-ից ավելի դպրոցներ, 3 կուսակցություններ, որոնք մասնաճյուղեր ունեն 30-ից ավելի երկրներում, եկեղեցական հզոր ցանց, մշակութային ու սպորտային կենտրոններ»,-ասաց Հրանուշ Հակոբյանը:

«Արմենպրես»-ի փոխանցմամբч անդրադարձ կատարելով Թուրքիայի տարածքում ապրող հայերին՝ նախարարը նշեց, որ մոտավոր հաշվարկներով այնտեղ ապրում է 3 միլիոն հայ, որոնցից շատերը ստիպված են թաքցնել իրենց ինքնությունը: «Ձևավորվել է երկկենցաղ հայը, ով մինչև 18:00-ն ապրում է որպես թուրք, իսկ դրանից հետո դառնում է հայ՝ ապրելով իր ընտանիքում»,-փաստեց Հրանուշ Հակոբյանը:

Նախարարը մեդիաֆորումի մասնակիցներին կոչ արեց ուշադրություն դարձնել ու անդադառնալ այնպիսի հարցերի, որոնք Հայոց ցեղասպանության հետևանքն են: «Կխնդրեի ուշադրություն դարձնեք, որ եվրոպական տարածաշրջանում միակ փակ սահմանն ունի Հայաստանը, քանի որ Թուրքիան շրջափակման մեջ է պահում մեր երկիրը՝ հասցնելով միլիարդների վնաս: Ցեղասպանության հետևանքները շարունակվում են սփյուռքում, որովհետև ցանկացած սփյուռքահայ ֆինանսական ու հոգեկան ահռելի միջոցներ է ծախսում, որպեսզի հասնի արդարության, և ով է «հաշվել» այդ տառապանքը: Մյուսը՝ Թուրքիան ակնհայտորեն կեղծում է իր և համաշխարհային պատմությունը, որով պետք է լրջորեն զբաղվել»,-ասաց Հրանուշ Հակոբյանը:

Նրա խոսքով՝ Թուրքիան, անցյալում մնալով անպատիժ, այժմ էլ շարունակում է իր հանցագործ քաղաքականությունը: «Կցանկանայի, որպեսզի Հայոց ցեղասպանության դասերը ճիշտ ներկայացնեք աշխարհին, որպեսզի ոչ մեկ անպատիժ չմնա: Վերականգնելի վնասը պետք է վերականգնել, չվերականգնելի վնասը՝ հատուցվի: Այն թուրքերին, ովքեր ժխտում են Հայոց ցեղասպանությունը, հարց ուղղեք՝ ինչ եղան 2.5 միլիոն մարդիկ, ովքեր ապրում էին այնտեղ: Հարցրեք՝ ինչու էր Դեր Զորի անապատը պատված մարդկային ոսկորներով: Ինչու աշխարհասփյուռ եղավ ողջ հայ ժողովուրդը, ինչու ստեղծվեցին այդքան որբանոցներ ու ծերանոցներ, ինչու այդ օրերի դեսպանները սարսափահար նամակներին գրեցին իրենց ղեկավարներին»,-ընդգծեց Հրանուշ Հակոբյանը:

Իր ելութը նախարարն ավարտեց այն մտքով, որ հայությունը պայքարելու է, որպեսզի աշխարհում այլևս երբեք չկրկնվեն ցեղասպանությունները: